Kreu demokrat Sali Berisha njoftoi dje pasdite, gjatë një takimi me përfaqësues të shoqërisë civile, mbajtjen e protestës së parë kombëtare, kundër atij që e konsideroi si regjimi i Edi Ramës, më 7 korrik.
Vendimi i Berishës duket se kapi të papërgatitur të praishmit në tryezë, të cilët prej rreth 3 orësh në reagimet e tyre, e konsideronin shumë të largët nisjen e protestave në shtator, sikundër kishin deklaruar më parë disa nga deputetët apo drejtuesit e rinj të PD.
Por Berisha në fjalën përmbyllëse tha se protesta do të mbahej më 7 korrik dhe kërkoi angazhimin e një gjithë aktorëve dhe faktorëve për suksesin e saj, duke e cilësuar si një betejë që duhet të shtrihet në të gjithë vendin.
Ai gjithashtu foli për krijimin e një fronti opozitar, ku të përfshiheshin të gjitha grupet e interesit, forcat politike opozitare, apo cilido që ishte kundra një regjimi që varfëronte shqiptarët.
Por si u morr vendimi për mbajtjen e protestës më 7 korrik, ndërkohë që në ditët e fundit thuhej se gjithçka do të niste në vjeshtë, kur pritet edhe një riorganizim i plotë opozitar?
Nga raportimet mësohet se vendimi është marrë pas takimit që Berisha ka pasur me disa prej drejtuesve të degëve të PD, të cilët i kanë kërkuar nisjen e protestave, duke shfrytëzuar situatën e rëndë ekonomike, të krijuar nga rritja e çmimeve, por edhe mos mbështetja e Qeverisë për qytetarët.
Duket se pikërisht kërkesa dhe gadishmëria e drejtuesve të degëve për tu organizuar ka detyruar Berishën që të ndryshojë strategji, duke caktuar 7 korrikun si datën e fillimit të protestave, ndërsa nuk dihet nëse ajo do të mbetet e vetme përgjatë muajve të verës, apo do të jetë vetëm fillimi i një procesi të gjatë.
Nga raportimet mësohet se gjithçka do të varet nga protesta e 7 korrikut, sa e madhe do të jetë ajo, dhe çfarë reagimi qytetar do të ketë.
Berisha ka denoncuar Bordet e Transparencës të ngritur nga qeveria për të caktuar çmimet e produkteve bazë dhe të karburanteve.
“Rritje alarmante e çmimeve të ushqimeve dhe transportit. Në prill çmimet e ushqimeve dhe shërbimeve bazë u rriten nga 10-22 për qind në Shqipëri! Bordet apo shushunjat e qeverisë kontribuojnë me veprimtarinë e tyre në rritjen e çmimeve dhe përgjigjen e saj. Më të ekspozuarat përballë rritjes së çmimeve janë shtresat e varfra, të cilat shpenzojnë më shumë se 50% të buxhetit të tyre në këto produkte dhe shërbime. Qeveria në vend që të indeksojë dhe kompensojë çdo qindarkë për rritjen e çmimeve, ka vendosur bordet si mburojë të vetes dhe oligarkëve, të cilat, të blera nga oligarkët, vetëm përligjin rritjen e papërmbajtur të çmimeve”, është shprehur Berisha për bordet.
