Nga Boldnews.al
Pak ditë më parë, Kabineti i Edi Ramës miratoi kontratën për dhënien me qira 1 euro për 20 vjet ndërtesën e ish-Kombinatit të Sheqerit në Maliq në favor të kompanisë “Rozafa” shpk.
Shoqëria private është në pronësi të biznesmenit Gjergj Luca, i njohur për deklarimet e tij të zjarrta publike në adresë të shefit të qeverisë dhe nismave të tij të shumë-debatuara, siç është edhe “Ballkani i Hapur”.
Luca nuk shquhet për elokuencë të madhe publike, madje me raste edhe vulgare. Por, megjithatë, pathosi i treguar prej biznesmenit të peshkut duket se e ka ngrohur kryeministrin Edi Rama.
Prej vitit 2015, kompania “Rozafa” ka marrë mbi 90 mijë metra katrorë trojë e ndërtesa publike, me qiranë simbolike 1 euro, me kohëzgjatje shumë-vjeçare.
Kontrata më e fundit është ajo që Luca ka nënshkruar me Bashkinë e Maliqit dhe që ka marrë autorizimin pa asnjë ekuivok nga shefi i qeverisë.
Kontrata
“Boldnews.al” ka siguruar kontratën e nënshkruar ndërmjet Gjergj Lucës dhe Bashkisë së drejtuar nga socialisti Gëzim Topçiu, e cila mori edhe miratimin qeveritar.
Në bazë të kësaj kontrate, shoqëria “Rozafa” shpk merr me qira 1 euro pasurinë shtetërore të llojit ndërtesë, me sipërfaqe totale 4900 metra katrorë, në ish-Kombinatin e Sheqerit të Maliqit.
Në këmbim, Gjergj Luca ka bindur administrën lokale dhe vetë kryeministrin Rama, se ai do ta shndërrojë godinën e vjetër në një ambjent funksional dhe do të punësojë banorë të zonës.
Referuar parashikimeve të kontratës, rezulton se “Rozafa” shpk ka marrë përsipër që të kryejë një investim në vlerë 136 milionë lekë të reja.
Ky investim parashikon ndërtim dhe përpunim aktiv të produkteve dhe mallrave që ka aktivitet shoqëria private.
Gjithnjë sipas plan-biznesit, kompania e Gjergj Lucës i ka premtuar Ramës dhe Bashkisë së Maliqit se do të hapë 150 vende të reja pune.
Plani i biznesit është konfidencial dhe nuk bëhet e ditur se cili do të jetë destinacioni i objektit shtetëror dhe sa janë të justifikuara shpenzimet e parashikuara dhe pritshmëria për punësim.
Kompania “Rozafa” shpk ka objekt kryesor të aktivitetit të saj peshkun, prodhimin, përpunimin dhe shitjen e tij.
