Në orët e para të mëngjesit të sotëm, një sasi lënde plasëse u hodh nndaj biznesit të 58-vjeçarit, Shaban Aga. Ky i fundit, referuar raportimeve, ka deklaruar se kjo është hera e pestë që biznesi i tij sulmohet në të njëjtën mënyrë, ndërsa kërkon nga policia të zbardhë ngjarjen.
Aga është një prej aktivistëve të PD në Durrës, por ngjarja nga hetimet paraprake nuk ka lidhje me angazhimin e tij politik.
Sipas një njoftimi zyrtar nga policia, shpërthimi ndodhi në orën 03:11 minuta në lagjen 17/1 rruga “Shenjtoret” në fasadën e dyqanit të 58-vjeçarit Aga.
“Dyshohet se shtetasi D.K, 31 vjec, banues në Burrel, në bashkëpunim me persona të tjerë ende të paidentifikuar, kanë hedhur një sasi të vogël lëndë plasëse, duke shkaktuar vetëm dëme materiale”, njoftoi policia.
Dyshimet janë se ngjarja ka lidhje me një konflikt të mëparshëm mes autorit të dyshuar për të cilin thuhet se është me origjinë nga Burreli dhe djalit të 58-vjeçarit, i cili ndodhet në Britaninë e Madhe si emigrant. Nga raportimet dyshohet se mes gjithçka ka lidhje me një borxh, por policia është treguar e rezervuar lidhur me ngjarjen.
Nga kamerat e sigurisë dyshohet se lënda plasëse në fasadën e dyqanit është hedhur nga një automjet, i cili kalon me shpejtësi dhe pak sekonda më pas ndodh shpërthimi.
Pronari i biznesit të sulmuar me lëndë plasëse shprehet për mediat se u bënë 5 herë që vijnë te shtëpia.
“Dy herë kanë ardhur i kanë hedhur makinës benzinë, dy herë të tjera kanë gjuajtur me armë, mbrëmë kanë ardhur kanë hedhur tritol. Unë s’kam konflikt me njeri. Pyesni gjithë zonën, gjithë lagjen.
Policia bën punën e vet, ai personi me mua nuk ka pasur asnjë konflikt. Ai personi mua më ka thënë dy llafe, dhe ato që ka thënë, i ka thënë në polici. Ky muhabet ka pak a shumë 6 muaj. Kaq di. Dyshimet i ka vetë policia, ta zbardhin këtë çështje. Unë jam në shtëpinë time, në punën time, në hallin tim.
Policia të bëjë punën, unë për vete s’i kam borxh askujt. Mbrëmë në shtëpi isha. Shpërthimi ishte shumë i fortë, unë për fat isha vetëm në shtëpi, gruan nuk e kisha aty, çunat i kam jashtë. Vetëm drejtësi, të zbardhet sa më parë kjo çështje. Ose do marr masat e mia, nuk do rri me duar në xhepa”, thekson ai.
