Një hotel në Korçë është sekuestruar me vendim të Gjykatës së Rrethit. Dyshohet se “Tree Hotel” është ndërtuar me para me prejardhje nga aktivitete të jashtëligjshme.
Pasuria që vlerësohet 15.100.000 lekë, është në pronësi të një 60-vjeçareje, por sipas hetimeve, dyshohet se është përfituar nga aktiviteti i jashtëligjshëm i 34-vjeçarit Erion Demolli, me precedent penal në fushën e prodhimit dhe shitjes së narkotikëve.
Sekuestrimi
Policia e Korçës njofton se specialistët e Seksionit për Hetimin e Krimit Ekonomik-Financiar në Drejtorinë Vendore të Policisë Korçë kanë dërguar materialet paraprake hetimore në Prokurorinë pranë Gjykatës së Rrethit Gjyqësor Korçë, e cila ka regjistruar procedimin penal për veprën penale “Pastrimi i produkteve të veprës penale ose veprimtarisë kriminale”.
Në zbatim të këtij procedimi, nën drejtimin e Prokurorisë pranë Gjykatës së Shkallës së Parë Korçë, pas një periudhe dyvjeçare hetimesh, u bë ekzekutimi i vendimit të datës 08.06.2022, të Gjykatës së Rrethit Gjyqësor Korçë, për vendosjen e sekuestros preventive për pasurinë me sipërfaqe 182 m² truall, ndërtesë 147 m² dhe kat shtesë 176 m², në rrugën “Naum Voskopoja”, Korçë.
Kjo ndërtesë funksiononte si hotel dhe ishte në pronësi të L.K., 60 vjeçe, banuese në Korçë.
Nga veprimet hetimore dyshohet se kjo pasuri ka rrjedhur nga aktiviteti kriminal i 34-vjeçarit Demolli, banues në Korçë, i cili është dënuar më parë për veprën penale “Prodhimi dhe shitja e narkotikëve”.
Të ardhurat e fituara nga aktiviteti kriminal, sipas të njëjtave burime, ai dyshohet se i ka investuar në biznesin në emër të shtetases L.K., me të cilën ka lidhje familjare.
“Tree Hotel”, foto nga Booking
Lexo edhe:
Iu sekuestrua hoteli/ Kush është Erioni, pjesë e një grupi ndërkombëtar
