Pasuri me vlerë 15 milion lekë u sekuestruan në Korçë pasi dyshohet se janë krijuar nga veprimtaria kriminale e një 34-vjeçari të dënuar për drogë.
Behët fjalë për një ndërtesë 147 m² dhe kat shtesë 176 m², dhe një truall në rrugën “Naum Voskopoja”, të qytetit juglindor.
Hoteli dyshohet se është produkt I veprimtarisë kriminale të Erion Demollit, i dënuar më parë për veprën penale “Prodhimi dhe shitja e narkotikëve”.
Pas një hetimi gati dy vjeçar, prokuroria ka arritur të bindë gjykatën se Demolli paratë i kishte investuar në biznesin në emër të një 60-vjeçareje me të cilën ka lidhje familjare.
Më datë 8 Qershor, gjykata e Korçës ka vendosur sekuestron e pasurive, vendim që u zbatua nga Policia këtë të mërkurë.
Erion Demolli, ishte mes 21 të arrestuarve të operacionit të Koduar Limit, si rezultat i të cilit u goditën 4 grupe kriminale në fushën e narkotikëve falë bashkëpunimit të autoriteteve shqiptare me ato greke
Sipas hetimit të kohës, në bashkëpunim anëtarët e grupeve sillnin farë kanabisi nga Holanda, e kultivonin dhe përpunonin në Shqipëri.
Më pas droga trafikohej drejt Greqisë e vendeve të tjera të BE, ku këto grupe kriminale kishin ngritur rrjetin e vet të shpërndarjes së lëndëve narkotike të llojit kanabis e kokainë
Këto grupe kriminale organizonin dhe mundësonin kalimin e paligjshëm të emigrantëve nga Lindja e Mesme, të cilët vinin nga Greqia në Shqipëri dhe më as në drejtim të Malit të Zi, me destinacion vendet e Bashkimit Evropian.
