Majlinda Brakaj, shefja e kuzhinës shqiptare që emigroi drejt Greqisë shumë vite më parë sot numëron plot 38 medalje në profesionin e saj.
Brakaj u largua në këmbë drejt Greqisë pavarësisht se babai e kishte paralajmëruar se nëse do të largohej nuk do të ishte më vajza e familjes.
“Kam ikur nga mali për në Greqi. Isha munduar dy herë dhe im atë më thotë, nëse ikën prapë nga shtëpia nuk do të jesh më vajza e familjes. Isha me një grup shoqërie nga puna. Edhe i thashë: ‘Baba unë do iki nëse nuk më ecën do hidhem nga mali që vetëm ti të jesh krenar për mua”, tregoi ajo.
Ajo foli edhe për vështirësitë që hasi në Greqi për shkak të racizmit.
“Atëherë ka qenë shumë e vështirë, pasi në vitet 90 racizmi ishte shumë i ndjeshëm. Nëse nuk ishe e krishterë dhe ishe myslimanë ishte problem për ta. Madje, unë mezi kam çuar vajzën në shkollë se nuk e pranonin se ishte shqiptare. I thoshin ik nga këndi i lojërave të luajnë një herë fëmijët grekë pastaj ti, se janë shqiptarët. Shkova për të regjistruar vajzën për shkollën e dizajnit dhe më thanë që kanë një vend në kuzhinë. Unë pranova menjëherë se mamaja ime ka qenë kuzhiniere dhe e kisha me pasion. Kështu nisa shkollën dhe isha nxënësja më e madhe e klasës. Tashmë kam fituar mbi 38 medalje në kuzhinë”, tregoi ndër të tjera Majlinda në intervistën për ABC.
