Kreu demokrat Sali Berisha, gjatë një tryeze me mjekë dhe profesorë të shëndetësisë, tha se është fatkeqësi që sot Shqipëria po përgatit fëmijë dhe bluzat e bardha për emigracion.
Ndërsa e konsideroi si një dramë për sistemin e shëndetësisë, Berisha tha se Qeveria ka mbajtur një qëndrim përçmues ndaj mjekëve.
“Sa kanë ndryshuar pagat tuaja në 9 vite? Unë ju them ju se me borxhin që ka marrë kjo qeveri, nga 62.6% kur morri pushtetin në 107 % sot, rrogat tuaja mund të ishin rritur edhe 4 herë”, tha Berisha, duke iu drejtuar mjekëve të pranishëm.
Berisha tha se edhe në kohën e diktaturës, gardiani i burgut nuk guxonte të hynte në dhomën ku vizitohej i burgosuri, ndërsa në kohën e sotme, shikojmë se dy gardianë hyjnë në dhomën e mjekut dhe dy rrinë te dera. “Çfarë është kjo? Dhunë ndaj dhomës së mjekut, ishte një shkelje kodi që as në diktaturë nuk u aplikua ndaj mjekëve”, tha ai.
Ish-Kryeministri tha se organizimi shëndetësor në kohën e Covid-19 ishte kriminal dhe në një vend me drejtësi të pavarur do të kishin nisur hetimet. “Gjithçka u bazua në një koncept çnjerëzor policesk”, tha Berisha, duke shtuar se kjo u zgjodh për të shpallur dështimin si sukses.
Kreu demokrat tha se u keqpërdorën ekipet e urgjencës, ndërsa mjekët e familjes u nxorrën jashtë loje në një kohë kur thuhej se ishim në luftë.
“U kthyem në një nga vendet me vdekshmërinë më të lartë si pasojë e pandemisë”, tha Berisha, duke shtuar se kjo tregonte përçmimin që Qeveria ka ndaj mjekëve.
