Kanë kaluar tashmë 24 orë nga ngjarja e rëndë, ku mbeti i vrarë në Fier Petraq Gjika.
Policia ende nuk e ka një autor të ngjarjes. Pista kryesore mbetet ajo e vrasjes për motive të dobëta.
Akoma nuk është gjetur thika me të cilën dyshohet se është kryer vrasja, edhe pse territori është kontrolluar imtësisht.
Gjika mësohet se ka qenë në kabinë, në vendin ku rri roja, e ka dalë prej aty kur ka dëgjuar zëra.
Autori e ka qëlluar me thikë në bark. Gjika ka ngritur më tej duart lart, si një mbrojtje, pasi në duar janë vënë re edhe shenja të tjera të goditjeve me thikë.
Pasi është siguruar që 67-vjeçari ka ndërruar jetë, autori e ka tërhequr atë deri në afërsi të koshit të mbeturinave, duke mbuluar me plasmas vendin ku kishte kryer vrasjen e ku ndodhej edhe pellgu me gjak.
Dyshimet janë që autori është larguar bashkë më thikën që ka kryer krimin, një mjet prerës më i madh se thika e bukës, është larë në një çezmë pranë rrugës dhe është larguar.
Ka dyshime që autori ka fshehur jo vetëm thikën, por edhe rrobat që kishte veshur, pasi mendohet që kanë qenë me shenja gjaku.
Nga ana e policisë janë shoqëruar për t’u marrë në pyetje të njohur të 67-vjecarit, persona me të cilët ai kalonte kohën gjatë momentit që ishte në punë si dhe familjarë që mund të kenë dijeni për kontaktet e fundit të Gjikës.
Në ditët përpara ngjarjes 67-vjecari qëndronte me roje të serave të tjera si dhe cobanë, të cilët ruajnë bagëtitë në zonën e Mbrostar Urës.
Sekuestrimi i kamerave të sigurisë të serës dhe subjekteve të tjera, pritet të zbulojnë lëvizjet gjatë orëve të natës dhe në të gdhirë, kur u gjet edhe trupi i pajetë.
Familjarët e Petraq Gjikës nuk kanë pranuar të flasin për këtë ngjarje të rëndë.
