Kreu i PD, Sali Berisha, tha se janë zbardhur përgjimet e bandës së Elbasanit me bandat qeveritare. Berisha tha se Taulant Balla është një familjar i bandës.
Ish-Kryeministri deklaroi se është kjo arsyeja që ai ka kërkuar që marrëveshjet e ekstradimit mes Shqipërisë dhe vendeve të Beneluksit duhet të vijnë të miratohen në Kuvend.
Berisha tha se janë 6 ministra që janë kapur në përgjime me bandat, ndërsa shtoi se është kjo arsyeja sepse po pengohet miratimi i marrëveshjeve të ekstradimit. Ish-Kryeministri nuk dha emra, por shtoi se ato do tí sjellin prokuroritë e vendeve mike.
“Nga përgjimet dalin komunikime mes bandave qeveritare të Elbasanit me bandat shqiptare në vendet e Bemeluksit. Këto vende po japin një kontribut historik në luftën ndaj krimit në Ballkan”, tha Berisha.
Berisha tha se qeveria e ka fshehur marrëveshjen e ekstradimit pikërisht për arsye se 6 ministra dhe shumë deputetë rrezikojnë të ekstradohen në Belgjikë, Holandë dhe Luksemburg.
“Së pari, denoncoj qeverinë e cila nuk sjell në Parlament marrëveshjen e ekstradimit me vendet e Benelux-it. Dhe këtë nuk e bën për faktin e vetëm se të paktën 6 ministra dhe shumë deputetë socialistë janë kandidatë për ekstradime”, u shpreh Berisha.
Gjithashtu, Berisha tha se Balla ka mbi 100 telefonata me Nuredin Dumanin dhe bandën e Talo Çelës.
“Kam një pyetje, sa i pagove Nure Dumanit për të të ‘shpëlarë’ tek Manhasat? Kjo do të dalë. Dhe nuk është vetëm kjo. Por ja ku po ua them të nderuara zonja, ai ka mbi 50-100 telefonata me Dumanin, me sharrën, me gozhdën dhe me bandën e Suel Çelës, Talo Çelës e të tjerë me radhë”, u shpreh Berisha.
