Deputetja e PD-së, Orjola Pampuri, e ftuar në emisionin “Radari Informativ” në Abc, u shpreh se opozita nuk ka bojkotuar asnjë nga tentativat për të qenë pjesë e bisedimeve për Presidentin e ri.
Ajo tha se ishim pjesë e diskutimeve dhe nuk kemi bojkotuar asnjë tentativë për të qenë pjesë e bisedimeve për të pasur një President konsensual. Kishim dhe platformë.
“Presidenti duhet të jetë përfaqësues i unitetit kombëtar. Sot të gjithë ata që folën për pazare duhet të tërheqin ato deklarata që kanë thënë. Nuk ishte asgjë e vërtetë. Firmat ne nuk i thamë për të pasur një konsensus me PS, por për të qenë figura e Presidentit konsensuale. Ne donim që kjo figurë, e cila vinte nga propozimet e opozitës, të kishte konensusin e maxhorancës”, tha ajo.
Pampuri u shpreh se janë bërë ftesa për bisedime me të gjithë demokratët, përfshi edhe Rithemelimin.
“Janë bërë ftesa, është kërkuar të diskutohet, është diskutuar me aleatët. Se si i perceptojnë ata diskutimet, është çështje perceptimi. Alibeaj i ka ftuar që t’i bashkohen bisedimeve. Nuk është pranuar në asnjë formë. Kemi bërë mbledhjen e parë ku janë diskutuar 8 emra dhe nuk u formalizuan me qëllim që të bëhej ftesa të nesërmen dhe të ishte i pranishëm gjithë Grupi Parlamentar. Presidenti është mbi të gjitha palët, nuk njeh inate brenda një Grupi Parlamentar. Është bërë kërkesa që të bashkëpunohet me opozitën e bashkuar. Unë nuk e di se deri ku duhet të shkojë përpjekja për t’i pasur në tryezë”, tha ajo.
Deputetja Pampuri bëri të ditur edhe arsyen se pse opozita nuk e ushtroi të drejtën për të çuar kandidaturat e saj. Deputetja tha se nuk donin që figurat rigoroze që do propozoheshin nga opozita të bëheshin pjesë e farës së kryeministrit. Sipas saj, Rama kishte deklaruar që në fillim se do zgjidhnin një President të vetin.
“Ne paraqitëm një platformë dhe brenda saj kishte një pikë ku thuhej, nëse kjo platformë nuk pranohet nga maxhoranca ne nuk bëhemi pjesë e farsës së tyre. Kemi një platformë. Nuk bojkotuam, u ulëm. Biseduam. Arritëm një konsensus, konsensusi u shkel. Në momentin që ata thonë propozojini ju dhe ne do zgjedhim tonin, këta janë figura me integritet, nuk mund të bëhen pjesë e lojës së Ramës. Këto figura shkojnë për të garuar në një proces të drejtë. Kjo është që mos përdorësh figura rigoroze për tu bërë pjesë e farsës së Ramës”, shtoi ajo.
