Ish kryeministri, Sali Berisha ka mbyllur fushatën e tij elektorale ditën e sotme në qytetin e Vlorës, ku para takimit me anëtarët e partisë Demokratike, ish kryedemokrati bëri nderime tek busti i Hasan Prishtinës.
Në takimin me demokratët e Vlorës, Berisha theksoi sërish problematikat që kishte sjellë qeverisja e Edi Ramës përgjatë këtyre 9 viteve, duke u ndalur edhe tek përçarja e shkaktuar brenda partisë Demokratike.
Berisha më tej u bëri thirrje thirrje të gjithë demokratëve që të merrnin pjesë sa më shumë në votimet për kreun e ri që pritet të zgjidhet të dielën në 22 maj.
“Ju bëj thirrje të merrni pjesë në procesin e votimit dhe të votojnë të lirë. Por pjesëmarrja në këtë proces është jashtëzakonisht e rëndësishme për partinë Demokratike dhe të ardhmen e këtij vendi”-tha Berisha.
Ish kryeministri ka zhvilluar takime elektorale me mbështetësit e tij përgjatë nëntë ditëve me rradhë. Ndërkohë që kundërshtari i cili kandidon përballë tij, Ibsen Elezi ka kërkuar që të shtyheshin zgjedhjet për shkak se koha e vënë në dispozicion për takimet nuk ishte e mjaftueshme dhe se ishin kryer shkelje të rënda të statutit të PD.
