Gjykata Kushtetuese do të ketë pesë vende vakante për tu plotësuar pas mbarimit të mandatit të Altin Binajt dhe Përparim Kalos.
Sipas Kushtetutës, këto vende do të plotësohen një nga Kuvendi, një nga Presidenca dhe tre nga Gjykata e Latrë.
Presidenca do të zëvendësojë vendin vakant që lë bosh Përparim Kalo dhe në fillim të shkurtit mbylli procedurën e pranimit të kandidaturave.
Lista e plotë e Presidencës përbëhej nga Ardita Buna, Arta Marku, Arta Vorpsi, Besnik Dervishi, Elida Take, Gent Ibrahimi, Juliana Latifaj, Maksim Qoku, Manjola Xhaxho dhe Sandër Beci.
Më pas është KED-ja e cila duhet të vlerësojë me pikë të gjithë kandidatët dhe t’i çojë kreut të shtetit renditjen nga më të kualifikuarit. Lista nuk duhet të përmbajë më pak se 3 emra, ndërsa Presidenti nuk mund të zgjedhë emër tjetër përveç tre kandidatëve të parë.
Në listën e tre emrave më të kualifikuar mund të jetë edhe ai i ish ministrit socialist, Besnik Dervishi. Ai mban aktualisht postin e Komisionerit për të Drejtën e Informimit.
Në nenin 125 paragrafi 5 të Kushtetutës thuhet se “Gjyqtari nuk duhet të ketë mbajtur funksione politike në administratën publike ose pozicione drejtuese në një parti politike gjatë 10 vjetëve të fundit përpara kandidimit. Kritere të tjera, si dhe procedura për emërimin dhe zgjedhjen e gjyqtarëve të Gjykatës Kushtetuese rregullohen me ligj”, raporton News 24.
Në CV-në e dorëzuar pranë Gjykatës së Lartë dhe në Presidencë, Besnik Dervishi, aktualisht Komisioner për të Drejtën e Informimit dhe për Mbrojtjen e të Dhënave dhe deputet nga 2005 deri në 2009 deklaron se nga tetori 2013 deri në prill të 2014-s ka mbajtur postin e Prefektit të Vlorës.
Sipas Kushtetutës, afati 10-vjeçar që Besnik Dervishi të kualifikohet për t’u zgjedhur anëtar në Kushtetuese përfundon në prill të 2024-s.
