18 masa sigurie arrest me burg nga 32 të lëshuara janë ekzekutuar deri më tani në kuadër të aksionit që ka goditur 8 grupe kriminale që vepronin në vend.
Kreu i SPAK, Arben Kraja në një konferencë për mediat, bëri me dije se janë zbardhur disa vrasje.
8 grupe kriminale
Gjatë fjalës së tij, Kraja tha se janë evidentuar 8 grupe kriminale.
“Hetimet e kryera për këto ngjarje kriminale kanë evidentuar ekzistencën e 8 grupeve të strukturuara kriminale të cilët kanë shtrirje gjeografike kryesisht në qytetet e Tiranës. Durrësit dhe Elbasanit. Në Elbasan 4 grupe, në Durrës një grup dhe në Tiranë 3 grupe. Këta grupe kriminale jane dedikuar në veprat penale në dem të jetes dhe shëndetit si edhe në drejtim te pasurisë. Ajo që është karakteristikë për këta grupe kriminale eshte dhuna e egër e treguar në kryerjen e krimeve, si dhe pasojat shumë të rënda të ardhura nga kjo veprimtari kriminale. Pjesëtare të një grupi kriminal në raste të ndryshme bashkëpunojnë me grupe të cilët janë kundërshtarë të njëri- tjetrit. Hetimi ka nxjerrë në pah se grupet kriminale ishin në gjendje të paguanin shuma te medha parash për vrasjen e personave të cilët ata i konsideronin si kundërshtare. Mënyra e kryerjes së veprave penale tregon për një shkallë shumë të lartë organizimi dhe në këtë mënyrë edhe shkallë shumë të larte rrezikshmërie shoqërore”, tha Kraja, i cili saktësoi se 18 procedime penale janë bashkuar në një të vetë.
Duke iu përgjigjur interesit të gazetarëve, Kraja hodhi poshtë dyshimet se aksioni mund të jetë dekonspiruar.
Kreu i SPAK paralajmëroi dhe hetim pasuror për personat e arrestuar.
Kraja refuzoi ti përgjigjej pyetjes nëse Dumani është kthyer në bashkëpunëtor të drejtësisë, duke deklaruar për gazetarët se kjo e dhënë “përbën sekret hetimor”.
Aksioni pas arrestimit në Dumanit
Bashkë me kreun e SPAK, në konferencën për mediat foli edhe kreu i Policisë së Shtetit Gledis Nano, i cili evidentoi se “operacioni i koduar ‘Golden bullet’, që është në vijim, ka nisur menjëherë pas arrestimit të shumë të kërkuarit Nuredin Dumani”.
Lidhur me ekzekutimin e 18 masave të arrestit deri tani, Gledis Nano tha se 9 persona u kapën gjatë operacionit, ndërsa për 9 të tjerë, masat e arrestit me burg u ekzekutuan në burgje, ku të pandehurit ndodhen.
Operacioni, shtoi Nano, u shtri në disa qarqe: Tiranë, Durrës, Elbasan dhe Lezhë, ndërsa u përfshinë dhe forca speciale të policisë.
Forcat policore në aksion
“Gjatë operacionit, si rezultat i kontrollit të banesave dhe hoteleve janë sekuestruar 3 armë zjarri (konkretisht 2 kallashnikovë dhe 1 pistoletë), 2 antiplumb si ato që përdor Policia e Shtetit, municion luftarak, rreth 17 mijë euro, aparate celulare, fatura bankare, automjete dhe sende të tjera të përfituara nga veprimtaria kriminale”, shtoi ai.
Të arrestuarit
Të arrestuarit deri më tani janë 18. Mes tyre është edhe dhe shefi i krimeve në Komisariatin e Policisë Lezhë, Leonard Palushi. Ky i fundit, sipas burimeve, dyshohet se shiste informacion te grupet kriminale dhe dekonspironte aksionet policore.
“Mbetem i vendosur për të pastruar nga radhët e Policisë së Shtetit ata punonjës policie që shpërdorojnë detyrën apo më keq akoma bëhen palë me krimin, si dhe inkurajoj agjencitë ligjzbatuese që të hetojnë çdo rast të përfshirjes së punonjësve të Policisë, në veprimtari të kundërligjshme”, tha Gledis Nano gjatë konferencës për mediat.
Personat e arrestuar janë:
- Nuredin Dumani
- Henrik Hoxha
- Ardian Uzuni
- Altin Ndoci
- Skerdi Tasi
- Leonard Palushi
- Fatos Gosa
- Erion Alibej
- Gentajan Sharra
- Florenc Cekrezi
- Elvis Koci
- Ilirjan Feci
- Petrit Qoli
- Agron Qoli
- Agron Qafa
- Hasan Plaku
- Besjan Xhixha
- Enver Diva
