Data 25 Maj do të jetë pushim për të gjithë zyrtarët në Tiranë.
Vendimi është marrë në mbledhjen e sotme të qeverisë dhe u njoftua nga ministri i Brendshëm Bledi Çuçi.
“Sot qeveria mori vendimin që datën 25 ta shpalli si ditë pushimi për të gjithë institucionet publike që janë të qarkut të Tiranës”, tha Çuçi.
Kjo masë, sqaroi ai, merret për mbarëvajtjen e finales së Konferencë Ligë që zhvillohet në “Air Albania” mes italianëve të Romës dhe holandezëve Fejnord.
“Presim një fluks njerëzish që do vijnë nga Italia e Holanda për ta ndjekur, kemi interes për bileta për 5 ose 6 herë më shumë njerëz se sa kapacitet ka stadiumi”, tha Çuçi.
“Atë ditë ë Tiranë do jetë ditë pa makinë në gjithë Tiranën, përveç urgjencave dhe nevojave të gjithë organeve që do merren me mbarëvajtjen e eventit dhe të gjitha akset hyrëse në Tiranë do bllokohen në datën 25 deri në 6 pasdite. Që do të thotë se kushedo që do ti bashkohet festës së finales mund të vijë në Tiranë pas orës 6 pasdite. Kështu do garantohet që gjithë fluksi i paparë ndonjëherë në Tiranë të menaxhohet në mënyrë shembullore për ta kthyer këtë event në një festë të madhe jo vetëm të sportdashësve italianë dhe holandezë, por gjithë Shqipërisë”, shtoi ai.
