Ish-Kryeministri Sali Berisha, deklaroi nga Lezha, atje ku po zhvillon një takim me demokratët në kuadrin e fushatës për kreun e PD, tha se Lulzim Basha dhe Edi Rama asgjesuan votën e lirë.
Berisha bëri një krahasim mes Ramës dhe Bashës, duke theksuar se të dy asgjesuan votat në partitë që drejtonin, PS dhe PD.
“Ndaj misioni ynë është jetik për Shqipërinë. Ne fituam një betejë, por jo luftën, pasi kemi një betejë të vështirë përpara. Ne jemi shndërruar në një komb serë, që rrisim fëmijët për të emigruar. Shqiptarët janë përçudnuar, shpërfyturuar dhe gjithçka ka të bëjë se në këtë vend u vra shpresa”, tha Berisha.
Duke iu referuar votimit në Kuvend ku u hodh poshtë rezoluta për dënimin e gjenocidit në Bosnje, Berisha tha se ajo rezolutë që u rrëzua nga Edi Rama në Kuvend ishte miratuar nga Parlamenti Europian dhe nga Kongresi i SHBA.
“Interesi ynë kombëtar po shkelmohet, po bëhen përpjekje për të shpërbërë qenien tonë, ndaj ne duhet të mbrojmë kombin tonë. Çfarë ndodhi në këto 8 vite? Shqiptarët sot janë më të keqpaguarit në rajon, janë të zhytur në varfëri, duke i lënë dy alternativa: ose ikni, ikni, ikni nga ky vend, ose topituni në varfëri”, tha Berisha.
Ish-Kryeministri shprehu besimin se përballë kësaj situate shqiptarët do ia dalin, por duhet që secili prej nesh të angazhohet dhe të sqarojë shqiptarët për tiu bashkuar lëvizjes sonë të fuqishme dhe të pandalshme.
