Çdo e dielë do të ishte pa makina në qytetet kryesore të çdo qarku. Mirëpo në Lezhë dhe Vlorë, kjo nismë e marrë nga Qeveria, nuk po zbatohet.
Në Lezhë, dita pa makina ka sjellë boshatisjen e disa rrugëve, si “Luigj Gurakuqi” dhe bulevardi “Gjergj Fisha”, por trafik të rënduar në disa të tjera. Në Vlorë, akset rrugore si bulevardi “Ismail Qemali” apo Lungomare që ishte përcaktuar që do të ndalohej qarkullimi i automjeteve, kanë qarkullim normal, madje në shumë raste edhe trafik të dendur..
Ministrja Mirela Kumbaro deklaroi ditë më parë se mjeti do të fikej nga qytetarët në qytetet kryesore të çdo qarku. Sipas saj, Bashkitë do të bënin koordinim në bashkëpunim për të kursyer e për të menduar për mjedisin dhe për shëndetin e qytetarëve.
Nga data 3 prill, e diela e parë e çdo muaji do të jetë si fillim ditë pa makina në qytetet kryesore të çdo qarku. Nëse s’e fikim dot automjetin gjatë gjithë kohës, të paktën ta bëjmë ditëve të pushimit dhe të përdorim biçikletën a ecjen në këmbë. Fillojmë menjëherë në koordinim me bashkitë këtë plan kombëtar për kursim, për mjedisin dhe për shëndetin e të gjithëve”, njoftoi Kumbaro.
Në Tiranë, situata duket më e qetë, edhe pse duhet thënë se ka mjete në qarkullim.
