Dedë Pllanaj, që i shpëtoi atentatit mbrëmë në Dobrac të Shkodrës ka folur në lidhje me ngjarjen.
Ai tha se nuk e di se kush e ka qëlluar. Pllanaj ka thënë se një person i është afruar me motocikletë duke e qëlluar.
“Isha ulur te puna në karburant. Në një moment ka ardhur një motocikletë, drejtuesi i së cilës ishte me kaskë. Zbriti, është afruar drejt meje e më ka qëlluar. Nuk ia kam parë fytyrën e nuk e di se kush ishte. Personalisht nuk kam konflikte dhe nuk e di se kush mund të jetë”, ka thënë ai.
Dedë Pllanaj punonte si roje në karburantin, ku ka ndodhur ngjarja. Ai u plagos mbrëmjen e së shtunës në Dobrac të Shkodrës.
Ai është qëlluar me 6 plumba, por se fatmirësisht nuk i kanë prekur organet jetësore. Dedë Pllanaj është aktualisht i shtruar pranë Spitalit të Traumës në Tiranë.
Përsa i përket autorit ai ka qenë i vetëm dhe levizte me motoçikletë. Ai është afruar, ka zbritur nga motomjeti dhe në një distancë rreth tre metra ka qëlluar drejt 60-vjeçarit Pllanaj dhe më pas është larguar në drejtim të rrugës së Koplikut.
