Ish-deputeti demokrat Astrit Patozi ka refuzuar ftesën e ish-kryeministrit Sali Berisha për tu riafruar në Partinë Demokratike.
Në një deklaratë për gazetarët pas mbledhjes së mbrëmjes së djeshme të Komisionit të Rithemelimit, Berisha ftoi ish-figura të PD-së të larguar nga partia, të rikthehen sërish.
Sa i takon Këshillit Kombëtar, a do ketë një prezantim publik të listës që do i dërgohet Kuvendit dhe në këtë listë nga verifikimi që keni bërë a ka emra që rikthehen në PD, figura të rëndësishme që në 8 vitet e fundit janë larguar?
Berisha u përgjigj: Ka emra të tillë. Në këto lista është përshembull Arben Imami, Jozefina Topalli kthehet ex officio. Ka një ftesë në Kuvend për zonjën Bregu, edhe zoti Patozi, edhe Rudina Hajdari që u largua dhe u kthye. Të gjithë ata të cilët për një motiv a një tjetër u larguan janë të mirëpritur.
Patozi, nga ana tjetër, ka refuzuar ftesën.
Reagimi
“FALEMINDERIT, POR NUK JAM NË KËRKIM…”, e nis reagimin ish-deputeti, përmes një postimi në FB.
“Meqë më paska dalë emri mbrëmë dhe media është shprehur shumë e interesuar, e gjeta të udhës të jap një përgjigje të shkurtër. Faleminderit, që na kujtojnë ende, por unë nuk jam në kërkim të ndonjë partie. Aq më pak të atij lloji, që janë katandisur si mos më keq nga drejtimi i gabuar për një kohë të gjatë dhe të pandërprerë. Ndjehem shumë rehat sot me jetën dhe lirinë time, ndërkohë që për asnjë çast në këtë botë nuk kam menduar se politikë bëhet vetëm brenda një partie dhe vetëm rrotull një udhëheqësi legjendar dhe të pagabueshëm. Por meqë ftesa verbale për “dasëm” qenka bërë pas mesit të natës, kujtoj se e njëjta gjë ka ndodhur edhe 5 vjet më parë, kur na larguan. Natyrisht, pa votë dhe pa mbledhje forumesh politike. Të paktën, orën mund ta kishin ndërruar. Se në dorë vetë e kishin, si atëherë edhe tani”, shkruan Patozi.
