Pas publikimit të rezultateve në të cilat thuhet se presidenti i deritanishëm i Francës, Emmanuel Macron do të jetë në krye të shtetit edhe për pesë vjet, ka ardhur edhe reagimi i kundërkandidates së tij, Marine Le Pen.
“Ne mund të kishim parë një erë të madhe lirie që përfshiu këtë vend”, citohet të ketë thënë Le Pen para mbështetësve të saj të mbledhur në Paris.
Por siç ka shtuar më tej ajo, votuesit francezë “vendosën ndryshe”. Megjithatë, ajo e konsideron këtë “një fitore të shkëlqyeshme”. Le Pen thotë se kundërshtarët që e konsideruan partinë e saj të vdekur “mijë herë e një mijë herë e kishin gabuar”.
“Unë do të ndjek angazhimin tim për Francën dhe francezët”, ka thënë ajo duke u zotuar se do të udhëheqë betejën e ardhshme elektorale të Tubimit Kombëtar, zgjedhjet legjislative të qershorit, duke thënë se votuesit francezë kanë treguar se duan një forcë tjetër për të kundërbalancuar fuqinë e Macron si president.
“Rroftë Republika dhe rroftë Franca”, ka përfunduar ajo, përpara mbështetësve kryesorë nën interpretimin e himnit kombëtar, “La Marseillaise”.
Sipas France 24, Emmanuel Macron u zgjodh për një mandat të dytë si president francez të dielën me 58.2% të votave, sipas një vlerësimi nga instituti i sondazheve Ipsos.
Ndërsa sfiduesja e tij e ekstremit të djathtë Marine Le Pen fitoi 41.8% të votave në zgjedhjet që panë shkallën më të lartë të abstenimit në vend në 50 vjet.
Si Macron ashtu edhe zonja Le Pen janë përpjekur të marrin 7.7 milionë votat që shkuan për kandidatin e majtë Jean-Luc Melenchon, i cili u mund në votimin e parë më 10 prill.
Në raundin e parë, Macron mori 28% të votave, zonja Le Pen 23.2% dhe Melenchon kishte 21.7%.
