Partia Socialiste i ka kërkuar kryetares së Kuvendit, Lindita Nikolla që raundi i parë për zgjedhjen e Presidentit të ri të mbahet më 4 maj.
Kreu i grupit të PS, Taulant Balla në një konferencë për mediat, tha se nga nesër deri më 29 prill do të zhvillohen negociata.
“Tre raundet e para kërkojnë konsultime për gjetjen e një presidenti konsensual”, tha ai duke iu referuar Kushtetutës që përcakton zgjedhjen e kreut të shtetit me shumicë të cilësuar.
PS ka në Kuvend 74 mandat që nuk mjaftojnë për zgjedhjen e Presidentit në 3 raundet e para, ku kërkohen 84 vota. Megjithatë parashikohet që në raundin e katërt, Presidenti zgjidhet me shumicë të thjeshtë – 71 vota. Balla tha se socialistët gjatë 10 ditëve konsultime, kanë përfshirë në bisedime grupin e deputetëve të PS, grupet parlamentare të opozitës, shoqërinë civile si dhe qytetarët.
Balla bëri me dije se nesër, anëtarët e Grupit Parlamentar të PS do të propozojnë emrat konkretë për Presidentin e ti të Shqipërisë: “Në një zarf çdo deputet i Grupit Parlamentar përmes një formulari propozues do të ketë mundësinë të propozojë jo më shumë se 3 kandidatë/e. Nesër anëtarët do t’i depozitojnë në një sekretari të posaçme. Ne do të ftojmë shoqërinë civile të bëhet pjesë e konsultimeve. Ne do t’i ftojmë që të sjellin propozimet e tyre”.
Balla ftoi në një takim nesër tre kryetarët e grupeve të tjera në Kuvend:“Enkelejd Alibeaj, Mesila Doda, Fatmir Mediu ftohen në një takim paraprak në zyrat e kuvendit të Shqipërisë me qëllim që të nisim të vendosim parimet kryesore të një dialogu konstruktiv mes 4 grupeve parlamentare”.
I pyetur pse nuk ftojnë përfaqësues të Komisionit të Rithemelimit, Balla tha se procesi kërkon konsultim me grupet brenda parlamentit. “Unë nuk njoh asnjë grup parlamentar me këtë emër, po të kishte do ti kishim ftuar”, tha Balla.
