Ish-kryeministri Sali Berisha dënoi sërish këtë të Mërkurë qëndrimin e ambasadores amerikane Yuri Kim, e cila e quajti Enkeljed Alibeajn “kryetar të komanduar të PD-së”.
Berisha tha se Kim po sillet si guvernatore dhe shtoi se askush s’do të ndërhyjë në punët e brendshme të Partisë Demokratike.
Deklaratat i bëri për gazetarët pas mbledhjes së Grupit të Rithemelimit të PD-së në selinë blu.
Ish-kryeministri u pyet nëse PD rrezikon të shpallet “non grata”?
“Kryetari i PD-së u shkarkua më datën 11 Dhjetor me 4446 vota të delegatëve dhe 44000 votat e anëtarësisë. As guvernatorja, as Zeusi, as Rama s’do kenë tagër mbi PD. Një përpjeke e dështuar për të ndërhyrë në shkelje flagrante të konventës së Vjenës në sovranitetin e një force politike të lirë. Kurrë as kryetarin dhe as kryesinë s’do e caktojë kush për këtë parti përveçse anëtarësia”, tha Berisha.
“Çdo shqiptar e ka të qartë se në ç’gjendje ka qenë PD sikur të ishte një seksion i guvernatores, se s’dua ta përdor termin ambasadë se ambasadat dhe ambasadorët janë të repsektuar, por zonja shkel çdo rregull për terrenin që ka gjetur te Rama dhe Basha për të bërë atë rol që bën”, tha më tej Berisha.
Ish-kryeministrit iu kujtua edhe deklarata e djeshme, kur tha se Yuri Kim i ka dërguar një person në zyrë, ku i propozonte që të hiqte dorë provizorisht nga gara për kryetarin e PD-së, ndërsa i kishte garantuar edhe largimin e Bashës. Berisha u pyet se kush ishte personi në fjalë.
“Jo i dërguari është privat është privat dhe s’mund ta bëj publike, i kam bërë të qartë se s’mund të pranoj ndërhyrje për çështjet e kryetarit dhe asnjë ndërhyrje tjetër për punët e brendshme të PD. Unë e kam bërë të qartë dhe kam faktuar se s’do pranoj ndërhyrje nga askush”, u shpreh ai.
Berisha mohoi se Alibeaj do të penalizohet për qëndrimet e tij personale dhe shtoi se ai është kryetar i grupit parlamentar të PD.
“Alibeaj është kryetar i grupit parlamentar, grupi parlamentar natyrisht drejtohet nga kryesia e grupit parlamentar dhe kërkesa është kjo, që vendimet të merren nga kryesia dhe komisioni i rithemelimit mund të ndërhyjë, por s’ka arsye se linja jonë është e qartë, kundërshtari është Rama”, tha Berisha.
I pyetur nëse do votohet emri i propozuar nga PS për president, Berisha tha se parimisht PD s’pranon asnjë emër të propozuar nga Edi Rama.
“Për presidentin do merret vendimin nga Këshilli Kombëtar që do zgjidhet më 30 prill. Si rregull PS s’pranon asgjë propozim të Ramës. Nëse Rama për shkak të dhunimit të zgjedhjeve, etj, vendos që Presidentin ta propozojë PD ose opozita, atëherë do nisim konsultimin me forcat e tjera politike dhe formumet dhe do përcaktojmë qëndrimin”, tha Berisha.
Ish-kryeministri bëri me dije se në mbledhjen e sotme u diskutua për procesin e zgjedhjeve të drejtuesve të partisë që do të zhvillohet në PD.
