Një vrasje tipike mafioze e mirëmenduar ka ndodhur rreth orës 22:30 minuta pranë mbikalimit të Rinasit.
Iljaz Çali, 37 vjeç u ekzekutua teksa lëvizte me një makinë që e kishte marrë me qira.
Dyshohet se autori i këtij krimi ka ditur çdo lëvizje të viktimës, madje e ka ndjekur edhe nga mbrapa.
Në afërsi të mbikalimit të Rinasit, është hapur zjarr ndaj makinës tip “Land Rover” me të cilën udhëtonte Iljaz Çali.
Pas breshërisë së plumbave makina ka dalë jashtë kontrollit, ndërsa dyshohet se autori/ët, janë afruar dhe e kanë qëlluar sërish, për t’u siguruar se ai ka vdekur dhe puna ishte kryer siç duhet.
Fillimisht është dyshuar për një aksident nga dëshmitarët që kanë qenë në zonë, pasi makina kishte dalë nga rruga, por më pas është kuptuar se kemi të bëjmë me një atentat mafioz.
Ngjarja deri më tani është mbuluar me mister, pasi pavarësisht se është qëlluar disa herë, në vendin e ngjarjes nuk është gjetur ende asnjë gëzhojë, çfarë nënkupton se autori apo autorët janë kujdesur të mos lënë prova.
Nga të dhënat e para siguruar prej grupit hetimor, është se Cali është aksioner në një minierë në Veri të Shqipërisë. Sipas të dhënave në QKB, ai rezulton të jetë aksioner në kompaninë ‘Çali Metal SHPK’, me objekt shfrytëzimin dhe përpunimin e mineralit të kromit, eksport i tij.
Në skedarët e policisë së shtetit ai rezulton një emër jo i panjohur për agjencitë ligj-zbatuese. Pas grabitjes së parave në aeroportin e Rinasit në Korrik 2016 policia përfshiu në kontrolle edhe banesën e Iljaz Çali, në Fushë Krujë, ku u zbuluan 682 rrënjë kanabis. Atë kohë sipas njoftimeve të Policisë së Shtetit u vu në pranga nëna e viktimës, Xhemile Çalin. Vetë Çali do të arrestohej disa javë më pas.
Ndonëse nuk ka një pistë konkrete, hetuesit dyshojnë se vrasja e tij mund të lidhet me konfliktet mbi tregtinë e kromit.