Ministrja Delina Ibrahimaj komentoi në A2 CNN dhe kërkesat e protestuesve, të cilët i lanë kohë qeverisë deri të shtunën për plotësimin e 7 pikave që sipas tyre do të lehtësojnë ndjeshëm xhepat e shqiptarëve.
Ibrahimaj u shpreh se qeveria i kalkulon me detaje të gjitha vendimet e saj dhe nuk ndikohet nga presionet e jashtme.
“Çdo qytetar ka të drejtë të protestojë, të ngrejë zërin për atë që mendon se është e drejtë. Ne i kemi dëgjuar propozimet e protestuesve dhe kemi marrë vendimet tona me përgjegjshmërinë maksimale që të përballojmë situatën. Të njëjtat vendime kemi marrë dhe gjatë pandemisë kur e ardhmja ishte e pasigurtë. Ne vendimet nuk i marrim brenda natës, të nxitura nga protestat, por ulemi dhe analizojmë që të krijojmë një ombrellë sa më të mirë për qytetarët dhe bizneset shqiptare”, tha ministrja Ibrahimaj në “A2 Business”.
