Ministrja e Financave, Delina Ibrahimaj, ka bërë një deklaratë të pazakontë këtë të premte, në lidhje me rritjen e çmimeve në vendin tonë.
Në një pronocnim për mediat, në një kohë kur qytetarët po përballen me inflacion gjithnjë e në rritje, Ibrahimaj u shpreh se sipas vëzhgimit të qeverisë është rritur vetëm çmimi i perimeve jo ushqimet e tjera.
Sipas saj, situata nuk paraqitet shqetësuese dhe qeveria do të ndërhyjë vetëm nëse rriten çmimet e ushqimeve të shportës.
“Rritja ka ndodhur vetëm në kategorinë e perimeve ndërsa në të gjitha ushqimet e tjera nuk ka pasur rritje të çmimeve. Lufta nuk është në dorën e Shqipërisë për ta frenuar apo jo, çmimet janë rritur si pasojë e luftës, ne jemi këtu që pasojat të kenë ndikim minimal në ekonominë shqiptare. Janë mbi 80 produkte të shportës dhe asnjë nuk ka pasur rritje për shkak të luftës. Inflacioni shënoi në nivel 2,6%, që është nivel i kontrolluar ende. Nëse do të shohim që çmimet do të rriten edhe në produktet e tjera atëherë pa dyshim që do të ndërhyjmë me një akt që do të parashikojë të subvencionojë kategoritë e shtresave në nevojë”,- u shpreh Ibrahimaj.
