Prej rreth dy orësh qytetarët kanë protestuar para Kryeministrisë kundër rritjes së çmimeve në vend, duke nisur nga nafta, por edhe produktet ushqimore si dhe mallrat e tjera.
Sot, kishte një pjesëmarrje të lartë të qytetarëve që kundërshtojnë këto çmime duke hedhur akuza të forta ndaj qeverisë Rama.
Ndërkohë “Bordi Kombëtar i Administrimit të Karburantit” i krijuar pas protestave qytetare, ka vendosur rritjen e lehtë të çmimit të naftës. Bordi vendosi se çmimi i naftës do të tregtohet 217 lekë/Litër deri më 15 mars 2022, kur bordi do mblidhet sërish.
Nga bulevardi para Kryeministrisë ku po protestohej kundër rritjes së çmimeve, është lajmëruar se do të ketë sërish protestë nesër në orën 11:00 në të njëjtin vend – me qytetarët që nuk heqin dorë nga kërkesat e tyre.
Pas Kryeministrisë, qytetarë po marshojnë në rrugët e kryeqytetit.
Kjo është dita e katërt që qytetarët janë ngritur në protesta në Tiranë, ndërsa protesta paralele janë zhvilluar edhe në qytete të tjera të vendit.
