“Bordi Kombëtar i Administrimit të Karburantit” i krijuar pas protestave qytetare, se ka vendosur rritjen e lehtë të çmimit të naftës.
Bordi u mblodh këtë të Shtunë dhe vendosi se çmimi i naftës do të tregtohet 217 lekë/Litër deri më 15 mars 2022, kur bordi do mblidhet sërish.
Ndërkohë, në vend, këtë të Shtunë, ka pasur pompa ku nafta është tregtuar më lirë.
Siç duket dhe nga një foto e sjellë nga BoldNews.al, në një karburant pranë “Pallatit me Shigjeta”, 1 Litër naftë tregtohet me 216 Lekë – 1 Lekë më pak se sa çmimi i miratuar nga Bordi ditën e sotme.
Bordi vendosi po ashtu se çmimi i shitjes me pakicë të benzinës të jetë 217 Lekë/Litri.
Po ashtu, bordi vendosi që çmimi i shitjes me pakicë të gazit për periudhën 12 Mars-15 mars 2022, të jetë 93 lekë/litri (ndërsa sot u tregtua me 90 Lekë për Litër, referuar fotos më sipër).
Çmimet në këto stade duket se nuk kënaqën qytetarët, që njoftuan proteste para kryeministrisë edhe nesër në 11:00.
Ngritja e Bordit Kombëtar të Administrimit të Karburantit u njoftua nga kryeministri Edi Rama të Premten, pas protestave në disa qytete të vendit, ku qytetarët kërkuan uljen e çmimit.
Rama shpjegoi se Bordi Kombëtar i Administrimit të Karburantit do përbëhet nga përfaqësues të qeverisë dhe furnizuesve të naftës dhe do vendosë një çmim të unifikuar. “Çdo ditë, ju dhe qeveria, përfaqësuesit e qeverisë, konkretisht ministrja e Financave, ministrja e Energjisë, drejtori i Tatimeve, drejtori i Doganave do jenë në tryezë me 5 përfaqësues nga ju, zgjidhini ju, dhe s’do ketë asnjë tabelë në asnjë pikë karburanti ku do shfaqet një çmim që s’është miratuar nga bordi. Nëse ndodh, humb pikën e karburantit”, tha Rama.
“Përveç pjesës së transparencës, s’do imponojmë çmime arbitrarisht se kjo të çon në faliment, por do bëjmë transparencën e çmimit që çdo qindarkë është aty, jo për arsye të fitimit, por vazhdimit normal të punës”, shtoi Rama, i cili refuzoi të prekë taksat mbi naftën, që vlerësohen rreth 100 Lekë për Litër.
