Ish-kryeministri Sali Berisha deklaroi këtë të Mërkurë se është i gatshëm për çdo propozim që vendos në epiqendër votën e lirë të demokratëve shqiptarë. Ai pohoi se do të garojë për postin e kryetarit të PD-së.
“Do të garojë për kryetar të PD, por garantojë për çdo kandidat tjetër kushte të barabarta dhe garantoj demokratët që do të pranoja rezultatin pa asnjë koment. Rikthimi ka ndodhur më 6 mars. Ai nuk zhbëhet më, veçse me votën e qytetarëve shqiptarë”, tha Berisha në një deklaratë për mediat.
Ish-kryeministri u shpreh se Lulzim Basha – të cilit iu referua si “Brava” – “është një peng që se ka në dorë veten, por keqpërdoret dhe keqshfrytëzohet deri në fund sa të mos mbetet asgjë te ai”.
Duke iu referuar rezultatit të zgjedhjeve të 6 Marsit, Berisha tha Basha “është injoruar nga elektorati”, ndërsa shtoi: “le ta lëmë në fatin e tij”.
Ish-kryeministri u shpreh se “6 marsi faktoi një të vërtetë, rikthimi i Sali Berishës më një mbështetje prej 30 përqind të elektoratit shqiptarit”.
“Nuk po them se jemi shumicë, por është një stacion i fuqishëm për tu bërë shumicë”, tha Berisha.
Lidhur me reagimin e Bashës, i cili tha pas zgjedhjeve se “s’ka humbur asnjë betejë në jetën e tij”, Berisha tha se deklarata do të thotë “të jesh alien në politikë”.
Berisha tha se mirëpret çdo deputet që është distancuar nga Basha, ndërsa shtoi se “bashkimi ka në bazë vlerësimet e kontributeve të gjithsecilit në PD”.
