Europa League u rikthye me duele të rëndësishme në fazën playoff ku ekipe që u eliminuan në Champions u ndeshën me skuadra nga grupet e mëparshme të Europa League.
Barcelona-Napoli ishte dueli më i rëndësishëm teksa në “Camp Nou”, ekipi katalanas luajti për herë të parë pas 17 vitesh në Europa League por nuk shkoi më shumë se një barazim 1-1 ndaj Napolit.
Ekipi italian e nisi shumë më mirë ndeshjen teksa në një aksion të shpejtë konkretizoi me Zielinski duke shënuar golin e parë.
Skuadra e Xavit rriti presionin gjithsesi duke bërë më mirë me qarkullim të topit dhe në pjesën e dytë falë një penalltie të realizuar nga Ferran Torres vendos barazpeshën. Sfida mbyllet në barazim për t’u vendosur gjithçka në “Maradona Stadium” pas një jave.
Ndërkohë në sfidat e tjera, bie në sy humbja e thellë dhe surprizuese e Dortmund në shtëpi. Përpara tifozëve verdhezi, skuadra e Rose bën një figure të keqe pasi humbi 2-4 përballë Rangers. Zenit u mund 2-3 nga Betis në shtëpi ndërsa Sheriff Tiraspol vijon të surprizojë me fitoren 2-0 ndaj Bragës.
