Ish-mbrojtësi i Kombëtares shqiptare, Erion Xhafa, mendon se transferimi i ndeshjes nga Beogradi në Leskovac, ka qenë një taktikë e palës serbe për të ulur trysninë te ekipi.
Duke folur në “News 24”, Xhafa insistoi se kjo vinte nga kompleksiteti që kishin serbët për çështje që kishin pak lidhje me futbollin.
“Minutat e para janë gjithmonë pak problematike për pjesën emocionale, por pastaj besoj se në pjesën e fushës skuadra do të jetë më e fokusuar në pjesën e sportit.
Me Serbinë jemi treguar më shumë korrekt se sa duhet në të dy ndeshjet këtu, në krahasim me atë që ndodhi. Transferimi i ndeshjeve është në favor të tyre, zhvillimi i ndeshjes në Beograd është presion nga ana e tyre, jo e jona.
Te ne nuk ka pse të ketë presion. Serbët e kanë me ne, ne nuk kemi komplekse me askënd, ata kanë treguar që kanë komplekse me ne. E gjithë bota e njeh Kosovën, fakti që ata vazhdojë të thonë “Kosova është Serbi” është kompleksi i tyre, jo i yni. Këtë t’ia lëmë atyre, të stresojnë veten, ne nuk na intereson.
Pjesa e politikës apo federatës, se si shkoi situata mbrapa ndeshjes së parë, besoj se kanë nxjerrë mësime ndaj mund të marrin masa. Tifozët jo. Ne mund ta shfrytëzonim nëse do ishte në Beograd, në Leskovac është bërë me qellim që të jetë presioni më i vogël për serbët, që të ketë më pak probleme.
Jo se kalon presioni te ne, por një presion më të madh kanë hequr duke e larguar nga Beogradi, se nëse do të ishte e njëjta tifozeri, problemi do të ishte të ata. Te ata përjetohet ndryshe, përtej një ndeshje futbolli dhe kjo transmetohet te lojtarët. Në Beograd presioni do ishte te ata, por transferimi i ndeshjes e balancon deri diku”, tha ndër të tjera Xhafa.
