Lamine Yamal është konfirmuar si lideri i ri i Barcelonës dhe i kombëtares spanjolle. Me vetëm 18 vjeç, sulmuesi ka nisur sezonin në mënyrë të shkëlqyer: dy gola dhe një asist në tri ndeshjet e para të La Ligës. Aktualisht i grumbulluar me Spanjën për sfidat kundër Bullgarisë dhe Turqisë, ai dha një intervistë për RTVE ku foli për objektivat dhe sfidat që e presin.
Objektivat personalë dhe ëndrra e Champions-it
“Fitimi i Champions-it me Barcelonën do të ishte diçka e pabesueshme. Të gjithë lojtarët ëndërrojnë Topin e Artë, kush thotë të kundërtën, gënjen. Të jesh vetëm 18 vjeç dhe pretendent për këtë trofe individual është diçka e madhe dhe shpresoj ta arrij”, u shpreh Lamine. Ai shtoi se nëse nuk do ta fitonte vetë, do të donte që trofeu të shkonte te Neymar ose Messi, duke e quajtur brazilianin të nënvlerësuar në periudhën e tij më të mirë dhe argjentinasin “më i miri në histori”.
Përgjigjja për Flick-un dhe situata te Barça
Në lidhje me kritikat e trajnerit Hansi Flick pas barazimit në Vallecas, Yamal ishte i qartë: “Nuk ishte çështje egoje. Thjesht nuk e nisëm sezonin me të njëjtin intensitet si e përfunduam të kaluarin. Ai kishte të drejtë për gabimet, por nuk ishte problem egoje. Duhet të rikthejmë nivelin”. Ai theksoi gjithashtu se skuadra është e re dhe e uritur për trofe, pa pretendime të tepërta.
Kritikat dhe jeta jashtë fushës
Yamal pranon se shpesh flitet më shumë për jetën e tij private sesa për futbollin: “Nëse do të luaja te Mataró, askush nuk do të fliste për ditëlindjen time. Nuk më shqetëson, vetëm familja dhe rrethi im i ngushtë kanë rëndësi”.
Grumbullimi Spanjën dhe De la Fuente
Lamine e konsideron një surprizë të madhe grumbullimin e hershëm me kombëtaren: “Kemi një ekip për t’u shpallur kampionë bote”. Për De la Fuente, ka vetëm falënderime: “Është një nga njerëzit që më ka mbrojtur më shumë, gjithmonë me fjalët e duhura”.
