Lulzim Basha u shpreh sot se skandali i publikimit të pagave të qytetarëve ka lidhje me blerjen e votës në zgjedhjet e ardhshme.
Basha tha se përgjegjësi kryesor për këtë skandal është Edi Rama, ashtu sikundër ai ishte përgjegjës në rastin e patronazhistëve.
“Nuk ka nevojë të flasim për gjurmët, ja ku është ujku. Edi Rama është përgjegjës për skandalin e patronazhistëve, po aq sa për skandalin e inceneratorëve dhe këtë të fundit, publikimit të të ardhurave të shqiptarëve, duke i ekspozuar ato para gjithkujt”, tha Basha.
Sipas tij, ky skandal i fundit, as më shumë dhe as më pak është zgjatim i skemës së patronazhistëve.
“Me paratë e inceneratorëve u blenë votat, me nxjerrjen e të dhënave sensitive, u vunë në shërbim të masakrës zgjedhore. I bëj thirrje SPAK që të hetojë deri në fund aferën e inceneratorëve. Sikundër i bëj thirrje trupës diplomatike të akredituar në vend që ti japë mbështetjen absolute SPAK që të hetojë skandalin e patronazhistëve dhe këtë të nxjerrjes së pagave”, u shpreh Basha.
Ai tha se opozita gjithashtu do ti shkojë deri në fund hetimeve parlamentare, si në rastin e inceneratorëve ashtu edhe të masakrës zgjedhore.
Pjesë nga deklarata e Bashës
Jemi përpara një tangentopoli, që kërkon një mega proces. I bëj thirrje strukturës së posaçme antikorrupsion, byrosë kombëtare të hetimit, shërbimit informativ kombëtar, të krijojnë menjëherë infrastrukturën e nevojshme, që personat përgjegjës për këtë skandal të arrestohen, pra të mos të lihen në gjendje të lirë, apo në gjendje për tu arratisur, që të nisin menjëherë të gjitha proceset e nevojshme për vënien para përgjegjësisë të personave me mbrojtje politike.
I bëj thirrje përfaqësive të huaja në Tiranë, të ofrojnë të gjithë mbështetjen e nevojshme për strukturën e posaçme antikorrupsion, për strukturat relevante në policinë e shtetit dhe për shërbimin informativ shqiptar, sepse në momentin që flasim, informacionet pranë Partisë Demokratike tregojnë për një presion të jashtëzakonshëm politik nga personat e përfshirë direkt në skandalin e patronazhimit, në këtë aspekt të skandalit të patronazhimit, që është rrjedhja e të dhënave personale, mbi të ardhurat personale të shtetasve, sikundër vazhdon presioni, që skandali i inceneratorëve të mbyllet me Kokën, që është bishti, si i vetmi person nën hetim dhe i arrestuar.
I garantoj qytetarët shqiptarë, që pavarësisht ritmit dhe shpejtësisë së lëvizjes së strukturës së posaçme antikorrupsion, e cila dhe një herë, ka gjithë mbështetjen e Partisë demokratike dhe të opozitës, dhe timen personale si kryetar i saj. Përkundër presioneve nga ata që janë kapur në flagrancë, pavarësisht prej shpejtësisë së lëvizjes së tyre, Partia Demokratike është e vendosur, të zhvillojë me përkushtim, me të gjithë thellësinë dhe pa asnjë ndalesë, atë pjesë që kushtetuta ia ka garantuar, hetimin e plotë parlamentar, si të masakrës zgjedhore e në veçanti të skandalit të patronazhistëve, ashtu dhe të vjedhjes më të madhe të këtyre 30 viteve, asaj të inceneratorëve.
