Pala që mban selinë e Partisë Demokratike dështoi të bënte transparencë lidhur me pjesëmarrjen në Kuvendin e 18 Dhjetorit. Gjatë një konference për mediat këtë të Hënë, Gazment Bardhi shkeli premtimin e Lulzim Bashës, duke mos zbardhur emrat e 5004 delegatëve që morën pjesë në Kuvend, siç u deklarua nga pala organizatore.
Të Shtunën, në Pallatin e Kongreseve, u zhvillua Kuvendi i PD, thirrur nga Lulzim Basha dhe Kryesia e PD. Jemin Gjana, i caktuar si kryetar i komisionit të Kuvendit, deklaroi se këtë aktivitet morën pjesë 5004 delegatë. Gazment Bardhi dhe Lulzim Basha konfirmuan shifrën.
Duke iu referuar të dhënave publike lidhur me ambientin ku u zhvillua aktiviteti, mediat raportuan se salla ka kapacitet për rreth gjysmën e shifrës së delegatëve që sipas organizatorëve të Kuvendin ishin prezent në sallë. Akuza për manipulim shifrash pati edhe nga mbështetësit e Kuvendit të 11 Dhjetorit.
Megjithatë, Lulzim Basha dhe të tijtë nuk u tërhoqën nga shifra e deklaruar, duke argumentuar se delegatët u vendosën dhe jashtë sallës.
Gjatë një konference për mediat gjatë mbrëmjes, nga selia e PD-së, Basha premtoi se do të publikojë të nesërmen emrat e 5004 delegatëve që siç pretendohet, morën pjesë në Kuvend.
“Nesër, para çdo shqiptari do të hidhet poshtë çdo trillim, duke bërë transparent emrat e 5004 delegatëve që ishin të pranishëm”, tha Basha.
Deklarata ishte e qartë.
Megjithatë, të nesërmen askush nuk foli për çështjen nga pala që mban selinë.
Këtë të Hënë, në një deklaratë për mediat doli Gazment Bardhi – për ‘grupin e Bashës’ sekretar i PD-së, ndërsa për mbështetësit e Kuvendit të 11 Dhjetorit, i shkarkuar bashkë me shefin e tij politik.
E teksa pritej transparenca duke lexuar emrat e të gjithë delegatëve siç premtoi Basha, Bardhi lexoi emrat e më pak se 300 pjesëmarrësve në Kuvend.
Nga ana e gazetarëve iu kërkua lista e plotë, megjithatë Bardhi këmbënguli se këto ishin të dhëna konfidenciale të partisë.
