Deputeti demokrat, Dashnor Sula, konsideron si legjitim Kuvendin Kombëtar që do të mbahet më 18 dhjetor, duke e cilësuar atë si gjithëpërfshirës.
Në një intervistë për Ora News, Sula është shprehur se të gjithë demokratët në Kuvendin e 18 dhjetorit janë të lirë për të marrë pjesë dhe për të shprehur problematikat që kanë.
“Dua të shpreh keqardhjen për ngjarje të cilat ndodhin në shtëpinë e demokratëve. Nuk është normale një situatë e tillë për të gjithë demokratët, sidomos për ata demokratët e thjesht. Është krijuar një kakafoni se kush është i ligjshëm, data 11 apo 18. Do thosha se nëse do të rrimë strikt apo për të përcaktuar që të shpëtojmë PD, apo rruga më e drejtë për të qenë të bashkuar në PD, do thosha që data 18 është një datë gjithëpërfshirëse për të gjithë demokratët. Kjo datë në mënyrë legjitime dhe statutore Basha dhe kryesia e PD ka thirrur Kuvendin me datë 18 dhe në këtë Kuvend janë të lirë të gjithë demokratët për të qenë të pranishëm, për të ngritur problematika, për të bërë amendamente, dhe mund të zgjidhej edhe problem për të cilën diskutohet shumë për datën 11. Nëse do të kishte vullnet të pastër të sinqertë nga Berisha dhe nga mbështetësitë e Berishës, data 18 ishte legjitime”, tha Sula.
Ai shprehet se pas datës 9 shtator, dita kur Kryedemokrati Basha bëri të ditur vendimin për të përjashtuar ish-Kryeministrin Sali Berisha, ka pasur një situatë të ndezur.
“Pas datës 9 shtator e mbrapa ka pasur një situatë të ndezur, linçuese, për deputetët e PD, për nënkryetarët e PD, për sekretarin përgjithshëm, për kryesinë, për funksionarët e PD. Mua më vjen keq që të thuash për të gjithë kupolën e PD që janë ilegjitime dhe nuk janë në funksionet e tyre të zgjedhur në mënyrë ilegjitime kjo nuk është normale”, tha ai.
