Skandal në Elbasan, punonjësit e Ujësjellësit shkruanin faturat nga shtëpia, qytetarët të detyruar të paguajnë mbi 200 mijë lekë

Me librezat që faktojnë pagesat në duar, banorët e Lagjes Shënkoll në Elbasan denoncuan para ujësjellësit këtë të Hënë një skandal me mbifaturimin e ujit të pijshëm.

“Jemi mbledhur këtu sepse jemi një lagje e tërë që na ka ardhur një faturë jashtëzakonisht e rëndë për ujin”, u shpreh një prej tyre.

“51 mijë lekë fatura, unë 2 veta jam dhe s’kam paguar asnjëherë 51 mijë. Erdha këtu u interesova, më dha një formular dhe më tha shko se do dërgojmë faturistin. Erdhi faturisti tha shiko numrin e fundit të sahatit. Unë shkova te qendra e madhe “më tha i ke konsumuar”, shtoi një tjetër.

Banorët u shprehën të shqetësuar për shumat e mëdha që duhet të paguajnë ndaj kërkuan një zgjidhje.

“Ai më thotë ti paske një prapambetje shumë të madhe, 284 mijë lekë. U ftoha një çikë, pastaj mblodha veten”, tha një banor.

LEXO EDHE  VIDEO/ Pamjet kur “Range Rover-i” i Bashës qëllohet me vezë

“Njerëzit që kanë këto shuma marramendëse, erdhën në ndërmarrje. Nga personeli i ndërmarrjes ka qenë një mospërfillje”, deklaroi një tjetër.

Drejtori i Ujësjellës Kanalizimeve Elbasan, Aurel Kaja e pranoi abuzimin dhe fajësoi dy punonjës nën varësi:

“1 apo 2 punonjës nuk e kanë kryer detyrën si duhet. Nuk i kanë shkruar si duhet, por ka pasur raste që faturat janë shkruar nga shtëpia, pa shkuar fare në terren.”

Por, qytetarët do të jenë të detyruar që t’i paguajnë këto fatura, pasi ato nuk mund të fshihen nga sistemi.

“Po, po patjetër, çfarë është në sistem do paguhet. Është e pamundur që ne të heqim atë që lexon sistemi,” tha Kaja.