Pashko Ujka u ekzekutua në sy të vëllait dhe gruas, ja pistat ku po heton policia

Pashko Ujka, ish-deputet dhe ish-Kryetar i Komunës së Velipojës, humbi jetën pasditen e sotme në qendër të qytetit të Shkodrës, pas një atentati me armë zjarri ndaj tij.

Ujka mësohet se është qëlluar shumë pranë banesës së tij, ndërsa autori e ka qëlluar nga pas me një armë që dyshohet se ishte me silenciator.

Ish-deputeti i PDK ka ndërruar jetë në spitalin rajonal të Shkodrës, ndërsa u raportua se plumbi e kishte goditur në shtyllën kurrizore.

Ujka, 64 vjeç nuk ka mundur t’ju shpëtojë dot plagëve që kishte marrë.

Ngjarja ndodhi rreth orës 18:15 në lagjen “Vasil Shanto” në Shkodër, kur 64-vjeçari po lëvizte më këmbë me bashkëshorten dhe vëllain e tij. Mësohet se bashkëshortja ka dhënë dëshminë e parë në Policinë e Shkodrës duke deklaruar se autori që ka qëlluar ishte një person i vetëm.

Policia ndërkohë është vënë në kërkim të autorit dhe ka ngritur disa postblloqe për kapjen e tij.

LEXO EDHE  Rimëkëmbja ekonomike, KE: Konsumi i familjeve shqiptare dhe investimet mbeten të dobëta

Po kështu janë sekuestruar dhe pamjet e kamerave të sigurisë pranë vendit të ngjarjes, megjithëse moti i keq vështirëson qartësinë e tyre.

Ndërkohë pistat që po hetohen janë ato që lidhen me detyrën që ka kryer Ujka si kryetar i komunës së Velipojës në periudhën 2011-2015. Gjithashtu nga raportimet mësohet se po hetohet edhe në një pistë tjetër që lidhet veprimtarinë private të viktimës, i cili pasi është larguar nga politika, rezulton se merrej me biznese, qoftë në fushën e ndërtimit, ashtu edhe të hotelerisë. Gjithashtu po hetohet edhe një pistë mbi borxhe të akumuluara në vitet e fundit, edhe pse deri më tani qoftë policia ashtu edhe grupi hetimor, janë treguar të rezervuar në dhënien e informacioneve.

Kohë më parë, banesa e ish-deputetit është qëlluar me armë zjarri, ngjarje e cila mbeti e pazbardhur.

Ujka ka qenë deputet i Partisë Demokristiane në Kuvendin e Shqipërisë në legjislaturën 2005-2009, i zgjedhur në Shkodër.