Blerja e votave, SPAK mbyll hetimet për kandidatin e LSI

SPAK ka mbyllur hetimet për Etion Jokën, kandidatin për deputetet të LSI-së në zgjedhjet e fundit parlamentare, i cili akuzohet për kryerjen e veprës penale “Korrupsioni aktiv në zgjedhje”.

Prokuroria e Posaçme kundër Korrupsionit dhe Krimit të Organizuar njofton se ka regjistruar kryesisht procedimin penal Nr.131/2021, për veprat penale “Korrupsioni aktiv në zgjedhje” dhe “Korrupsioni pasiv në zgjedhje”, bazuar në pamjet filmike të transmetuara në datën 23 Prill 2021 në median audiovizive.

Sipas SPAK, nga të dhënat e përfituara nga pamjet filmike, si dhe nga tërësia e veprimeve hetimore të kryera në kuadër të këtij procedimi penal, rezultoi e provuar se: Etion Joka, kandidat për deputet në Qarkun e Tiranës në zgjedhjet e përgjithshme parlamentare të datës 25 Prill 2021, i ka ofruar një shumë prej 100 (njëqind) USD, shtetasit Elis Babo, në këmbim të sigurimit të votave.

LEXO EDHE  Moti i keq/ Trageti mbërrin nga Brindisi në portin e Vlorës, por nuk ankorohet dot

Në përfundim të hetimeve, në datë 26.11.2021, Prokuroria e Posaçme ka përcjellë në Gjykatën e Shkallës së Parë për Korrupsionin dhe Krimin e Organizuar kërkesën për kalim për gjykim dhe aktet e procedimit penal Nr. 131/2021, ndaj të pandehurve: Etion Joka, i akuzuar për kryerjen e veprës penale “Korrupsioni aktiv në zgjedhje”. Elis Babo, i akuzuar për kryerjen e veprës penale “Korrupsioni pasiv në zgjedhje”.

Joka u shpall në kërkim në muajin Prill, para zgjedhjeve, pas denoncimit në një emision televiziv, ku ai shfaqej duke premtuar para për blerjen e votave në Tiranë. Joka, i cili në zgjedhje mori 320 vota preferenciale, nuk arriti të zgjidhej deputet në Tiranë, qark ku garoi. Në Tetor, ai u arrestua nga policia.