VIDEO/ Basha: 52 mln euro për shpenzimet e luksit të qeveritarëve, ekonomi putiniste

Kreu demokrat Lulzim Basha u shpreh sot nga salla e Kuvendit se ndërkohë që flitet për krizë energjitike, Qeveria ka planifikuar 52 milionë euro shpenzime luksi.

Basha tha se 52 mln euro do të shpenzohen për makinat, për rikonstruksionet e zyrave, ndërkohë që kjo shumë do të mjaftonte për të mbuluar propozimin tonë për familjet në nevojë.

“Qeveria ka monopolizuar ekonominë për një grusht oligarkësh, ndërsa njerëzit rropaten për të siguruar bukën e gojës, për të çuar fëmijët në shkolla. Sipërmarrësit përballen me gjoba e presione, të drejta e të padrejta, ndërkohë që fillon loja e vjetër ku ishit ju dhe ku ishim ne”, tha Basha.

Sipas tij, nuk janë më shumë se 5-6 oligarkë, profilet e të cilëve, janë skicuar te milionat e eurove që dali nga Buxheti i Shtetit dhe shkojnë në xhepat e tyre.

Basha tha se kjo është një ekonomi putiniste.

Kreu demokrat tha se kjo Qeveria ka marrë më shumë borxhe se çdo qeveri tjetër në 30 vitet e fundit, ndërkohë që ka rritur taksat më shumë që nga koha e tanzimatit.

“Kemi mbledhur miliardat dhe nuk po i ktheni në shërbime për qytetarët. Po largohen të rinjtë dhe të rejat, po ikin profesionistët 13 herë më shumë se në Serbi, ndërkohë që pjesën e luanit e marrin oligarkët, që më pas depozitohen në parajsat fiskale. Shqipëria është kthyer në një lavatriçe të pastrimit të parave”, tha Basha.

Pjesë nga fjalimi i Bashës në Kuvend

E ndonëse qeverisni këtë vend prej 8 vitesh, gjysmën e të cilave të vetëm, pyetjet për cështjet kryesore që shqetësojnë shqiptarët i keni lënë pa përgjigjje.

Sepse ndonëse keni marrë më shumë borxh se të gjitha qeveritë e mëparshme të bëra bashkë, keni rritur taksat dhe tarifat më lart se kurrë më parë në historinë e këtij vendi që nga Tanzimati, nuk keni ditur t’i ktheni miliardat që keni keqmenaxhuar as në mirëqënie për qytetarët, as në paga dhe pensione më të larta dhe të dinjitetshme, as në përmirësimin e produktivitetit të sipërmarrjeve.

LEXO EDHE  Vrasja e trefishtë në Gllogjan, përjashtohet pista e terrorizmit

Përkundrazi. Miliardat që keni marrë borxh në emër të shqiptarëve, taksat që keni rritur për të financuar makutërinë tuaj, kanë shërbyer për ndërtimin e një ekonomie të përqëndruar në pak duar

Me shtetin e përdorur si punëdhënës patronazhistësh dhe i pak oligarkëve, me të cilët keni vrarë konkurencën e lirë, keni ndrydhur zhvillimin ekonomik, keni penguar investimet e huaja,

E keni bërë Shqipërinë një vend nga i cili largohen të rinjtë e të rejat, largohen profesionistët dhe forca prodhuese e shoqërisë.

Po dëmtoni prodhimin vendas, që ka nxitur dhe do vazhdojë të nxisë një rritje të mëtejshme cmimesh nga e cila penalizohen të gjitha familjet shqiptare

Kjo nuk është ceshtje buxheti, por mentaliteti.

Dhe mentaliteti juaj, duket edhe njëherë në këtë buxhet, që përvec taksave dhe aksizave që rriten dhe shtohen, shfaq dukshëm tahmanë për të mbrojtur status quo-në dhe interesat e një pakice, që pengon zhvillimin, që dëmton prodhimin vendas, që ka nxitur dhe do vazhdojë të nxisë një rritje të mëtejshme cmimesh nga e cila penalizohen të gjitha familjet shqiptare.

Mirëpo Shqipëria ndodhet përballë sfidave të mëdha dhe ka nevojë për zgjidhje po aq të mëdha.

Që ju nuk i jepni dot.

Sepse ndërkohë që ju majmeni e krenoheni majë plehut, vendi po plaket me shpejtësi marramendëse. Rritja e numrit të të moshuarve po shoqërohet me emigrimin e familjeve të reja dhe me normat më të ulëta të lindshmërisë në vend.