Prej kohësh në Shqipëri flitet për vaksinimin e detyruar, aplikimin e dozës së tretë të vaksinave për kategori të caktuara, mos lejimin e studentëve të pavaksinuar në auditore etj.
Të gjitha këto, në kuadrin e propagandës qeveritare, për të luftuar “armikun e padukshëm”, sikundër shprehet Kryeministri, konsiderohen si masa për të vënë në kontroll pandeminë e Covid-19.
Nëse merret i mirëqënë kujdesi që Qeveria dhe strukturat shëndetësore po tregojnë ndaj qytetarëve, në anën tjetër ka një tablo, ku ka grumbullime dhe festa të organizuara nga institucionet.
Në rrjetin social qarkullon një video, që mund ta ndiqni më poshtë, e cila tregon atë që ndodhte dje në një prej lokaleve në zonën e ish-Bllokut, ku qindra të rinj ishin të ftuar në një festë. Dhe si për ironi, festën e organizonte Bashkia e Tiranës, kryebashkiaku i së cilës, Erion Veliaj, paralajmëronte pak javë më parë se të pavaksinuarit nuk do të lejoheshin të rrezikonin qytetin.
Nuk dihet nëse të rinjtë embledhur dje në festë janë kontrolluar ose jo, i ka kërkuar dikush një “green pass”, për të cilën flitet shumë, por ajo që dihet është se sponsori kryesor i festës është Bashkia e Tiranës. Dhe për çudi përballë asaj që ka ndodhur nuk ka reaguar as Policia, e cila në jo pak raste ka tejkaluar limitet, në emër të zbatimit të rregullave anti-Covid.
Ndoshta sot mund të shfaqen anëtarë të Komitetit Teknik dhe të mbajnë ndonjë qëndrim, të shprehin edhe kritika, por nëse Veliaj organizon festa të tilla në mes të Tiranës, ose rregullat që i miraton shefi i tij politik, Edi Rama, nuk kanë ndonjë vlerë, ose Kryebashkiaku e ka ndarë mendjen që të kontribuojë në imunizimin e tufës.
