Në një nga seancat parlamentare, kreu i PD-së, Lulzim Basha, u shpreh se Sali Berisha, Ilir Meta dhe Edi Rama, janë brinjët e atij që e konsideroi si “trekëndëshi i Bermudës”. Deklarata e Bashës shkaktoi një seri reagimesh nga deputetë të PD, që janë pozicionuar në krah të ish-Kryeministrit Sali Berisha.
Ndërkohë, Kryeministri Edi Rama duket se nuk i ka marrë shumë seriozisht deklaratat e Bashës, ndërsa shprehet se i gatshëm për bashkëpunim pa asnjë kusht me kreun e PD.
“Unë e kam thënë që në fillim të këtij sezoni politik, të mandatit të tretë që jemi të gatshëm që të bashkëpunojmë me opozitën, te të gjitha çështjet pa asnjë paragjykim, jemi gati të bashkëpunojmë”, tha Rama në një intervistë në Report Tv.
Pjesë nga intervista në Report TV
Është sot Basha një lider me karakter, ju e keni quajtur më parë pa karakter?
Karakteri nuk është sëmundje ngjitëse, kështu çështja e karakterit është e lidhur me shumë gjëra dhe nuk caktohet nga një veprim apo nga një tjetër.
Basha plotësoi kushtet që u distancua nga Berisha dhe Meta, mos po bëheni dhe ju si BE-ja?
Ju harroni që Basha u distancua edhe nga unë.
Të gjithë e dinë që goditja më e madhe ishte për Berishën dhe Metën?
Jo unë nuk e di këtë, unë di atë që tha ai…
Nuk besoj se e merrni seriozisht?
Unë nuk marr asgjë seriozisht nga ato që thotë Lulzim Basha, përtej emrit, për çfarë mendoj unë për karakterin e lidershipit të tij, opozita në parlament është PD dhe kryetar i saj është Lulzim Basha dhe liderin e opozitës që ke përballë e zgjedhin të tjerët, detyra ime është që të mbajmë të shtrirë dorën e bashkëpunimit, përtej asaj që mendojmë për njëri-tjetrin.
Mund të na e sqaroni njëherë e mirë termin e bashkëqeverisjes, çfarë është ajo që keni dashur të thoni? Ju i keni votat nuk keni asnjë votë për deputetët e Lulzim Bashës…
Unë jam i gatshëm që të diskutoj pa asnjë kufizim, por nuk i kam vënë një emër. Shumica dhe pakica kanë hapësira shumë të mëdha bashkëpunimi kur kanë në funksion interesat e vendit.
