Deputeti i Partisë Demokratike, Oerd Bylykbashi beson se kreu demokrat Lulzim Basha u zgjodh në postin e tij me një proces të shpejtë, ndërkohë që nuk ishte bërë asnjë analizë për zgjedhjet.
I ftuar në ‘Spotlight’ në Vizion Plus, Bylykbashi tha se e ka kontestuar thirrjen e Bashës për zhvillimin e zgjedhjeve brenda partisë, pa u bërë një analizë për rezultatin.
“Ajo që kishim ne, ishte një proces anomalik, që çoi në zgjedhjen e kryetarit në mënyrë fare të papritur. Unë e kam kontestuar thirrjen e zgjedhjeve bashkë me katër kolegë të tjerë në mbledhjen e kryesisë. U tha që kishim qenë në unanimitet… absolutisht e pavërtetë. E kontestuam se s‘ishte momenti për të thirrur zgjedhje për kryetarin e partisë. Sepse, së pari duhet të jepnim llogari dhe analizë dhe të mbanim përgjegjësi se çfarë kishte ndodhur më 25-Prill dhe pse kishte ndodhur 25-Prilli”, tha Bylykbashi.
Sipas tij, Basha është ilegjitim dhe i zgjedhur me votim të hapur. Duke shkuar më larg, deputeti shton se sot partia nuk ka as nënkryetar e as sekretarë.
“Ka bërë nul gjithë ekzekutivin e partisë. Ne praktikisht sot nuk kemi nënkryetar, s’kemi sekretar të përgjithshëm, s’kemi sekretar organizativ. Pra, ne jemi në ilegjitimitet të funksionimit. Nuk ka votim. Nuk quhet votim ai, është zero. Duhet të ishte i fshehtë! Është bërë i hapur. Pra, është nul gjithë procesi, nuk bën, nuk ekziston”, shtoi Basha.
Sa i përket nismës së Berishës për mbledhjen e Kuvendit Kombëtar dhe dyshimeve për qëllimet e këtij të fundit lidhur me PD-në, Bylykbashi tha se nës kjo do ishte një luftë personale e ish-kreut të PD-së nuk do të ishte në krah të tij.
“Nëse do ishte thjeshtë për një interes specifik, qoftë të z.Berisha, unë nuk do isha futur në këtë betejë. Isha deputet, krahasimisht me shumë të tjerë, mund të kisha dhe gjëra për të humbur”, u shpreh ai.
Bylykbashi u ndal edhe në një tjetër moment të rëndësishëm, në ndryshimin e sistemit zgjedhor. Sipas tij, nëse ky sistem zgjedhor nuk do të kishte ndryshuar, PD mund të ishte sot në pushtet.
“Ndryshoi tek pika më nevralgjike, ajo që të gjithë mendonim se është tabu, sistemi zgjedhor. Nëse sistemi zgjedhor nuk do të kishte ndryshuar, ne sot do ishim në pushtet. U thye sistemi zgjedhor, u shkërmoq koalicioni, partitë performuan ndryshe…”, shtoi deputeti.
Berisha, për deputetin e PD-së është modeli fitues dhe nëse demokratët e duan dhe e zgjedhin, kjo është demokraci, sipas tij.
“PD ka nevojë për një model fitues. Z.Berisha ka dhënë një model fitues. A është ai modeli më i mirë? Le ta diskutojnë demokratët. Demokratët vendosin se kush është ai që ata duan. Po deshën Berishën, për kohën sa e duan ata, për kohën sa do të qëndrojë Berisha në detyrë, është demokraci e pastër”, tha ai.
