Helmimi në Krujë, prokuroria: Jemi në pritje të akt-ekspertimeve

Prokuroria e Krujës konfirmon çeljen e një hetimi lidhur me helmimin e rreth 500 personave që prej së Dielës, që paraprakisht dyshohet se është shkaktuar nga uji.

Prokuroria e Rrethit Gjyqësor Krujë njofton se në bashkëpunim me shërbimet e Policisë së Shtetit, në lidhje me këtë ngjarje ka nisur kryesisht hetimet për veprën penale ‘Ndotja e ajrit, e ujërave dhe e tokës’ me pasojë dëmtimin e shëndetit të personave.

“Hetimet në lidhje me këtë ngjarje janë duke u kryer në drejtim të zbulimit të shkaqeve që kanë çuar në helmimin e banorëve, si dhe individualizimin e përgjegjësive penale për personat përgjegjës. Për këtë qëllim, është urdhëruar kryerja e akteve të ekspertimit mjeko – ligjor për të përcaktuar se cili ka qenë shkaku i helmimit të banorëve. Janë duke u kryer hetime në drejtim të analizave fiziko-kimike dhe bakteriale të ujit të pijshëm që furnizon qytetin e Krujës, si dhe veprime të tjera hetimore për zbardhjen e të gjitha rrethanave në lidhje me këtë ngjarje. Aktualisht jemi në pritje të përgjigjeve të akteve të ekspertimit si më sipër mbyllet reagimi”, thuhet më tej në njoftimin e organit të akuzës.

LEXO EDHE  Aksident në aksin Fushë Krujë-Thumanë/ Makina përplas motorin, një i plagosur

Instituti i Shëndetit Publik bëri me dije një ditë më parë se, “dyshohet që reshjet e dendura të shiut ditën e shtunë pasdite dhe në orët e para të ditës së dielë, në të gjithë territorin e Bashkisë Krujë dhe në veçanti në Malësinë e Krujës ku ndodhen veprat e marrjes së ujësjellësit, të kenë sjellë kontaminimin e ujit të pijshëm, ku paraprakisht është konstatuar prezencë e amoniakut mbi normë”.