Deputetja demokrate Jorida Tabaku, shprehet se Qeveria Rama ka marrë borxhe, që janë barrë për shqiptarët, por qoka për oligarkët.
“Si u perdoren 3,5 mld euro Borxh?”, është pyetja që ka ngritur Tabaku, gjatë mbledhjes së Komisionit të Ekonomisë dhe Financave, në lidhje me borxhin publik të Shqipërisë.
Ajo argumentoi se ekonomia shqiptare nuk ka pasur ndonjë përfitim nga rritja e borxhit përkundrazi borxhi është marrë për të paguar pagat e të punësuarve.
“Qeveria e gjeti borxhin në 2013 në vlerën e 6.3 mld euro ndërkohë që në gjashtëmujorin e parë të vitit 2021 borxhi ka kapur vlerën e 10.29 mld euro. Nga një rritje e tillë e borxhit çfarë ka përfituar ekonomia shqiptare?! Dukshëm asgjë!”, u shpreh Tabaku.
Ajo shtoi më tej se situata në tregjet botërore dhe mbi të gjitha situata në ekonoominë globale do të ndikojë negativisht në normën e interesit për eurobondin. Nënkryetarja Tabaku argumentoi se Eurobondi do të ndikohet në normën e interesit dhe në treg edhe nga situata e Shqipërisë në sytë e ndërkombëtarëve.
“Po merret borxh për paga, pensione dhe koncesione që nuk ka ndodhur kurrë më parë. Borxhi ka arritur ne 95% te PBB!
Nuk duhet harruar, se Shqipëria është një nga vendet e përfshira në listën gri të Moneyval. Kjo do të ndikojë në rezultatin e nxjerrjes së Eurobondit në treg”, tha nënkryetarja demokrate.
Tabaku nënvizoi se situata e borxhit dhe manaxhimi i borxhit është trajtuar dhe nga FMN e cila ka kritikuar qeverinë Rama për të dy aspektet e manaxhimit dhe gjithashtu përdorimit të tij.
FMN, sipas Tabakut, ka kritikuar në mënyrë të vazhdueshme shpenzimet e qeverisë duke vënë theksin tek mungesa e eficencës dhe dërgimit të borxhit në shpenzime jo eficente si ato të PPP-ve.
