Administratori i OSHEE, Ardian Çela ka deklaruar në mbledhjen e Komisionit të Jashtëm se “kanë dështuar në mbledhjen e borxhit publik në kompanitë e ujësjellësve”. Çela tha se OSHEE ka marrë disa veprime ndaj tyre duke i bllokuar edhe llogaritë bankare.
“Sa i përket kompanive të ujësjellësit, Operatori i Shpërndarjes ka marrë disa veprime duke i bllokuar edhe llogaritë bankare. Tek ujësjellësit nuk kemi arritur të mbledhim borxhin. Pjesa tjetër ka qenë më mirë. Pushteti vendor ka reaguar. Pagesa me këste nuk e ndalon kamat vonesën për shkak të ligjit të tatimeve. Te Ujësjellësit kemi dështuar. Shpresojmë që me reformën e re për këto kompani të ketë një ndryshim”, u shpreh ai.
Zv/ministri i Infrastrukturës dhe Energjisë Ilir Bejtja theksoi se janë 37 ujësjellës që varen na bashkitë që nuk e shënojnë fare energjinë në pasqyrën e kostove të tyre.
“Nuk kemi ushtruar presion përmes tarifës. Paguajnë me çmim të ulët. 37 ujësjellës që varen nga bashkitë nuk e kanë fare energjinë në pasqyrën e kosotës së tyre, sepse janë me idenë nga e jep shteti. 57 janë gjithsej. Ka qenë rreth 12 mld lekë në vitin 2017”, deklaroi Bejtja.
Çela shtoi se deri në datën 1 janar të vitit 2022, çmimi i energjisë elektrike nuk do të ndryshojë.
“Deri më datë 1 Janar nuk preket tarifa. Më datë 1 Janar, enti rregullator paraqet propozimin. Deri më tani nuk ka aplikuar për asnjë rritje tarife. Tregu i liberalizuar ka filluar më shumë se vite përpara. Më 1 Janar, pjesa tjetër që janë të lidhur me tension të mesëm do dalin në treg të lirë. Platforma ka përfunduar mes OST dhe OSHEE. Rritje tarifash për 1 mln abonentë që furnizohen nga OSHEE nuk do ketë. Ne krahasimet i kemi bërë me veten. Shqiptarët e kanë harruar atë periudhë kur iknin dritat. Ka ende për t’u bërë por përmirësimet janë të dukshme. Në katër vitet OSHEE ka përballuar krizën e thatësirës sepse KESH për shkak të prurjeve nuk ka garantuar sasinë e nevojshme për të furnizuar klientët. I është dashur të ndërpresë investimet për të importuar energji në tregun e lirë. As tarifa nuk është prekur dhe as nuk ka trokitur në derën e qeverisë”, tha Çela.
