Nga Boldnews.al
Ergys Verdho, ka qenë një nga drejtorët më të lakuar në institucionet që ka drejtuar: ARRSH-në dhe KESH-in.
Dy institucione të “krimbura” me para, të cilat janë të njohura për tenderët e shumtë. Verdho njihet si një “besnik” i ministres Belinda Balluku, teksa të dy janë parë krahë njëri-tjetrin në vepra publike.
Boldnews.al ka publikuar me dhjetëra hulumtime për vendimmarrjen e këtij drejtori, i cili ka favorizuar oligarkët e rrugëve te ARRSH-ja, ndërsa tashmë po favorizon oligarkët e energjisë. Dhe, pasi “ngopi” këto kategori, Verdho dhe Balluku po shtrijnë tentakulat edhe në firma tepër të dyshimta, apo që pronarët dhe administratorët e të cilave kanë dalë në përgjime në Itali, si të lidhura me grupe mafioze.
Sipas dokumenteve që disponon Boldnews.al, Verdho ka favorizuar hapur firmën GTS, ose më saktë Gazra Teknike Shqiptare. Kjo firmë u bë e njohur për shitjen e “ajrit” gjatë pandemisë Covid 19, ose për fitimin e qindra tenderave për oksigjenin spitalor. Madje, këto tendera i janë dhënë pa garë nga Ministria e Shëndetësisë, apo nga Spitali Nënë Tereza, i Traumës, Senatoriumi apo Spitalët Rajonalë në qarqet më të mëdha të Shqipërisë.
Sipas dokumenteve që disponon Boldnews.al, KESH-i ka shpallur fituesin në tenderin me objekt “blerje mjet lundrues për pastrimin e biefit të sipërm nga akumulimet e materialeve dhe mbetjeve urbane për HEC Fierzë”.
Mësohet se mjeti lundrues duhet t’i vihet në dispozicion KESH-it brenda 30 ditëve, ndërsa në tender kanë marrë pjesë GTS me një ofertë prej 29,400,000 lekë të reja (rreth 300 mijë euro me TVSH) dhe operatori ekonomik “Naim 2020” me vlerë 27.000.000 lekë, pra 30 milionë lekë të vjetra më pak se oferta e GTS-së. Por, kjo ofertë është s’kualifikuar se s’ka shumë xhiro vjetore.
Gjithashtu, KESH-i thotë se s’ka punë të ngjashme, pavarësisht se kjo kompani kishte pastruar liqenin. Në dokumentet e s’kualifikimit vihet re se ato janë venë “copy paste” nga mjeti i servirur nga GTS-ja, çka ka sjellë dyshime të mëdha se gjithçka ka qenë e paracaktuar.
“Kapaciteti i kërkuar nga AK është 100L. AK ka kërkuar gjithashtu që mjeti të ketë të perfshirë krah fshirës, ndërkohë që mjeti i ofertuar nga OE ‘’Naim 20’’ sh. p. k nuk e ka të cilësuar në skedën teknike nëse ka të perfshirë apo jo krahun fshirës”, thuhet në këto dokumente, që janë tepër teknike.
Dhe, GTS-ja që njihet për tregtimin e oksigjenit, çuditërisht i përmbush të gjitha kushtet e vendosura nga Verdho, duke përfituar plot 300 mijë euro, sa ishte edhe fondi limit i akorduar nga KESH-i.
