Asetet termike të vendosura në Portin e Vlorës, të njohura si “tigrat”, vijojnë të jenë në qendër të debatit për koston reale të prodhimit të energjisë dhe eficiencën e kontratës së tyre.
Korporata Elektroenergjitike Shqiptare i mori me qira këto asete në vitin 2022 për prodhim energjie në kushte emergjente, në bashkëpunim me konsorciumin Exelerate Energy – Renco. Kontrata u firmos pas një procedure të përshpejtuar dhe me kohë të kufizuar gare.
Të dhënat e Entit Rregullator të Energjisë tregojnë se në vitet 2024–2025 janë prodhuar rreth 99.7 milionë kWh energji nga këto njësi.
Sipas analizave të Kontrollit të Lartë të Shtetit dhe të dhënave financiare të kontratës, kostoja e prodhimit rezulton disa herë më e lartë se çmimi i tregut, duke arritur rreth 675 euro për MWh, ndërsa energjia është shitur mesatarisht rreth 111 euro për MWh.
Në total, për prodhimin e kësaj sasie energjie janë shpenzuar rreth 56.2 milionë euro, pa përfshirë kostot shtesë operative dhe logjistike.
Diferenca mes kostos së prodhimit dhe çmimit të shitjes ka ngritur pikëpyetje mbi eficiencën ekonomike të skemës, e cila, sipas analizave, rezulton me humbje të konsiderueshme krahasuar me tregun.
Në këtë kuadër, mbetet i hapur diskutimi nëse projekti ka shërbyer si zgjidhje emergjente energjetike apo si një model biznesi me kosto të lartë për buxhetin publik./ piranjat
