Operacioni anti-drogë/ Detaje nga hetimet: Grupet kriminale ndihmoheshin nga Policia

Detaje të reja mësohen nga hetimet e aksionit të zhvilluar dje në Lezhë kundër kultivimit dhe trafimit të lëndëve narkotike, ku u ndaluan dhe disa efektivë policie.

Sipas SPAK, në kuadër të këtyre hetimeve njëvjeçare është arritur të dokumentohet veprimtaria e disa grupeve kriminale të përfshira në kultivimin e bimëve narkotike në zonat malore ndërmjet territorit të bashkive Pukë dhe Mirditë, të cilët kanë bashkëvepruar me njëri-tjetrin për të siguruar shitjen e lëndëve narkotike, si dhe kanë siguruar mbështetje për të vazhduar këtë veprimtari nga strukturat e policisë, të cilët i informonin për kontrollet që do ushtroheshin në zonë.

Droga e sekuestruar

Hetimet që kanë nisur në vitin 2020 kanë cuar në disa episode të sekuestrimit të lëndëve narktorike:

  • Në datë 02.12.2020 është sekuestruar sasia prej 37 kg e 450 gr lëndë narkotike “Cannabis sativa”.
  • Në datë 04.08.2021 në vendin e quajtur Qafa e Helmit mbi fshatin Shkozë, Pukë janë asgjësuar afro 4000 bimë narkotike të dyshuara ”Cannabis sativa”, të kultivuara në tre parcela dhe janë evidentuar tre ambiente të përshtatura për të qëndruar personat që kanë kultivuar bimët e dyshuara narkotike.
  • Në datën 01.10.2021 është sekuestruar sasia prej 12 kg lëndë narkotike ”Cannabis sativa” në zonën e fshatit Pletë, Pukë.
  • Në datën 01.10.2021 është gjetur vendi ku kryhej përpunimi i bimës narkotike dhe është sekuestruar ndër të tjera sasia e gatshme e lëndës narkotike “Cannabis sativa” me peshë 28 kg e 73 gr dhe një sasi tjetër e papërpunuar.

Arrestimet

Mbi bazën e kërkesës së Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar, më 17 Tetor ka vendosur caktimi e masave të sigurimit personal për personat e akuzuar.

  • Për 13 (trembëdhjetë) shtetas, njëri prej të cilëve me detyrë oficer i policisë gjyqësore (si pjesëmarrës në grupin e strukturuar kriminal), masa e sigurimit personal “Arrest në burg”, parashikuar nga neni 238 i Kodit të Procedurës Penale;
  • Për 3 (tre) shtetas, masa e sigurimit personal “Arrest në shtëpi”.
  • Për 4 (katër) shtetas, punonjës të policisë gjyqësore, masa e sigurimit personal “Detyrim për t’u paraqitur në policinë gjyqësore”.
LEXO EDHE  Dosja belge/ Si i terrorionte pronarët e lokaleve në Bruksel ‘Mbreti’ Safet Bajri

Nga ana e policisë gjyqësore janë ekzekutuar dje masat e sigurimit “arrest në burg”, për personat nën hetim L.N; Gj. K.; M.RR.; Z.L.; I.P.; L.K.; T.L.; A.K. dhe Y.V.; Ndërkohë që janë shpallur në kërkim personat nën hetim T.SH.; G.M.; G.T., si dhe K.B., ky i fundit me detyrë oficer i policisë  gjyqësore. Janë ekzekutuar gjithashtu masat e sigurimit personal “arrest në shtëpi”, për shtetasit S.L. dhe E.L.

Të gjithë shtetasit e mësipërm janë me cilësinë persona nën hetim për kryerjen e veprave penale “Kultivim i bimëve narkotike”, “Grup i strukturuar kriminal” dhe “Kryerje e veprave penale në kuadër të grupit të strukturuar kriminal”.

Ndërkohë janë ekzekutuar dhe masat e sigurimit personal “Detyrim për t’u paraqitur në policinë gjyqësore”, për personat nën hetim Z.M.; A.N.; P.F.; dhe F.A., me detyrë punonjës të policisë gjyqësore, si persona nën hetim për kryerjen e veprës penale “shpërdorim detyre”.

“Ndërkohë, hetimet po vazhdojnë në kuadër të dokumentimit të veprimeve të disa punonjësve të policisë gjyqësore, pasi dyshohet për përfshirje të tyre në këtë veprimtari kriminale”, njofton SPAK.

Lexo edhe:

Operacioni anti-drogë/ Kush janë policët e ndaluar (EMRAT)