Prokurori i Përgjithshëm, Olsian Çela deklaroi sot se është urgjente harta e re gjyqësore.
“Kryetarja e Lartë e Këshillit Gjyqësor më njohu me projektin dhe me çfarë ata i kanë propozuar realisht ministrit të Drejtësisë. Realisht në fakt ajo që përbënë thelbin e propozimeve përqaset me atë çfarë ka qenë ideja jonë, mënyra se si duhet konfiguruar kjo hartë e re gjyqësore. Mendojmë se në një plan afatmesëm do arrij të amortizojë vakancat e shumta që janë krijuar në sistem. Mos harrojmë se vakancat mund të vazhdojnë të shtohen dhe do të thotë që masat që ne do të marrim do të jenë drastike”, theksoi ai në një prononcim për media.
“Gjithashtu mendoj se kjo as nuk mund të jetë e vetme, patjetër kjo do të krijojë lehtësi në mënyrën se si do të funksionojnë qoftë prokuroritë, qoftë gjykata. Gjithashtu masa do të merren edhe përsa i përket funksionimit të shkollës së Magjistraturës. Besoj se është e domosdoshme që viti i tretë i Shkollës së Magjistraturës të kthehet në një vit të stazhit profesional në modelin e dikurshëm pasi kjo do të lehtësojë në një afat më optimal barrën e rëndë që po përballet i gjithë sistemi i drejtësisë”, përfundoi ai.
