Kim apel qeverisë: Merrni veprime të vërteta në mënyrë që Shqipëria të jetë më e drejtë, më e fortë dhe më e pasur

Ambasadorja amerikane në vendin tonë, Yuri Kim, pas takimit me zv.kryeministrin Arben Ahmetaj, u shpreh se udhëheqësit shqiptarë duhet të bëjnë ndryshimet e duhura në mënyrë që brezi i ri të ketë një të ardhme më të mirë.

“Tridhjetë vjet pas përfundimit të diktaturës komuniste, udhëheqësit shqiptarë nga të gjitha anët duhet të shfrytëzojnë mundësinë për të thyer zakonet e këqija të së kaluarës, të bëjnë ndryshime të vështira, por të nevojshme, në mënyrë që brezi i ardhshëm të ketë një të ardhme më të mirë. Nëse jo tani, kur? SHBA do të vazhdojë të jetë me ju në mbështetjen e plotë”, shkroi Kim në një postim në Twitter.

Ajo shtoi se me Ahmetajn ka diskutuar zgjidhjen e të drejtave të pronësisë, zbatimin e reformës në drejtësi dhe çështjen e pastrimit të parave:

“Ne diskutuam rëndësinë e zgjidhjes së të drejtave të pronësisë, duke përfshirë digjitalizimin e regjistrave për të kundërshtuar ndërhyrjen ilegale; zbatimi i reformës në drejtësi në mënyrë që qytetarët dhe investitorët të mbështeten në gjykata të pastra; trajtimin e pastrimit të parave dhe shqetësimeve të tjera të përshkruara nga FATF”.

Në postimin në rrjetin social, Kim i bën thirrje qeverisë të ndërmarrë veprime të vërteta në mënyrë që Shqipëria të jetë më e drejtë, më e fortë dhe më e pasur:

LEXO EDHE  Akuzoi Alket Hysenin për vjedhjen e pronave, i vr*sin papagallin dhe qenin: Ja kush e bëri

“Takova zv.kryeministrin Arben Ahmetaj për të theksuar dëshirën për partneritet të fortë me demokracinë, mbrojtjen dhe biznesin. Gjithashtu nënvizoi se SHBA është vendosur seriozisht mbi korrupsionin si pjesë e interesit tonë kombëtar. Ne i bëjmë thirrje qeverisë të ndërmarrë veprime të vërteta në mënyrë që Shqipëria të jetë më e drejtë, më e fortë dhe më e pasur”.