Ministrja e Financave, Delina Ibrahimaj, sqaroi sot projekt-vendimin për Eurobondet që do të emetohen nga institucioni që ajo drejton.
Sipas saj, në të gjithë analizën e ardhur nga FMN-ja dhe nga Banka e Shqipërisë, nuk ka asnjë sinjal për varfërim të xhepave të shqiptarëve, ndërsa shtoi se pagat janë rritur përgjatë viteve të kaluara dhe do të vazhdojnë të rriten në bazë të programit të qeverisë në 4 vitet e ardhshme.
Ibrahimaj: Ka pasur disa rritje të çmimit. Në muajin shtator inflacioni ishte 2.5%, ndërkohë inflacioni që tregon një rritje të ekonomisë duhet të shkojë në 3%. Banka e Shqipërisë parashikon se ky nivel do të arrihet në vitin e ardhshëm. Në të gjithë analizën e ardhur nga FMN-ja dhe nga Banka e Shqipërisë, nuk ka asnjë sinjal për varfërim të xhepave të shqiptarëve apo për rritje të normave të interesit.
Dua të kujtoj se pagat janë rritur përgjatë viteve të kaluara dhe do të vazhdojnë të rriten në bazë të programit të qeverisë në 4 vitet e ardhshme. Pra, të ardhurat e disponueshme të familjeve shqiptare kanë ardhur në rritje gjatë gjithë periudhës së kaluar.
