Nga Boldnews.al
Edhe letrën e dorëheqjes së tij nuk dinte ta shkruante. Ia nisi kryeministrit një copë letre të shkruar të gjitha në gabime dhe mbi të gjitha as me numër protokolli, as kokë të institucionit e as vulë. Përtej kësaj, kjo ishte faza e fundit e një idiotësie personale që u shtri e gjitha në një polici pushteti dhe jo shteti.
Në letrën e dorëheqjes, Ardi Veliu thotë se ka “sakrfikikuar”, në vend që të shkruaj “sakrifikuar”, apo ndër të tjera shkruan se ka kërkuar “dorehqjen”, pra dorëheqjen. Më tej ai thotë se: “ne keto moment kam vendosur te mos kerkoj nje mandat tjeter”. E shkruar me shumë gabime, që tregon edhe nivelin personal të kryepolicit që ka drejtuar për katër vite, Veliu ka harruar se Policia e Shtetit nuk funksionon me mandat qeverisës.
Pak para se të zyrtarizohej shkarkimi i tij, Ministri i Brendshëm Bledi Çuçi u shpreh në lidhje me Veliun se: “Do ta merrni vesh kur do t’i mbarojë kandili”. Kandili po i fiket kryepolicit Ardi Veliu. Shumëkush mund të mendojë se e përdorën dhe në fund e hodhën, si një limon jo vetëm të shtrydhur, por të kalbur tërësisht. Por jo, Veliu do jetë një nga emblemat e pushtetit të Rilindjes.
Ai nuk do të rrijë pa punë, një vend do ja gjejnë në polici, për ta mbajtur aty deri kur Rilindja të ketë frymë. Me gjasë ai do ti futet “biznesit” të ri. I mjafton të regjistrohet në QKR dhe të hapë “studio konsulence” për servilizëm dhe ngjitje në karrierë, pa pasur asnjë aftësi, por vetëm me lëpirje kap majat dhe çfarë majash, asaj të Rilindjes.
Do të mbahet mend si kreu i policisë së shtetit që shkonte në vendet e ngjarjeve dhe numëronte gëzhojat e qitura nga krimi dhe numrin e viktimave. Do të kujtohet për mbytjen e qytetarëve me gaz lotsjellës në çdo protestë të mbajtur në vend. Do të kujtohet si njeriu që me paaftësinë e tij u shtoi punën agjencive funerale…
Është etaloni i njeriut të bindur politik, për mbrojtjen deri në shkelje të hapur ligjore të pushtetit, kur u shpreh se në ngjarjen në Elbasan që u mbyll me një të vrarë dhe katër të plagosur, nuk kishte materiale zgjedhore, ndonëse në automjetin e personazheve të krimit të lidhur me pushtetin u gjetën kopje të kartave të identitetit të zgjedhësve dhe përbri tyre edhe shumat e pagesave për një votë.
Dhe më e fundit do të kujtohet edhe për ditën e fundit të punës së tij, kur në mëngjes bie një avion që dyshohet se transportonte drogë nga Malësia e Madhe dhe në darkë vriten dy banorë të Elbasanit dhe si gjithnjë autorët largohen pasi kanë lënë pas edhe flakën e automjeteve që përdorin në kryerjen e krimit.
Do të mbahet mend edhe për kriminalizimin e thellë të policisë së shtetit dhe ngritjen në majë të drejtimit të të paaftëve. Atë e thirri Fatmir Xhafaj, duke i varur në kundërshtim me ligjin tre grada më shumë ngase i takonin për tu kthyer më pas me dëshirën e tij në një lodër pushteti, të cilën ai vetë ia pa hairin, ndonëse paaftësia e “kambales” siç i pëlqente ta quanin përfundoi edhe me një letër skandaloze dorëheqjeje.
